Macho ya mashabiki wa soka nchini leo yanaelekezwa Chamazi, ambako Azam FC na Simba SC zitakutana katika mchezo wa Ligi Kuu ya NBC unaotazamiwa kuwa na ushindani mkali.
Timu hizo zinakutana katika mchezo wa Mzizima Derby utakaochezwa kwenye Uwanja wa Azam Complex kuanzia saa 1:00 usiku, huku kila upande ukiwa na sababu zake za kutaka kuondoka na matokeo mazuri.
Kwa Simba, mchezo huo ni sehemu ya hesabu za kusaka pointi muhimu katika mbio za ligi. Wekundu wa Msimbazi wameanza msimu kwa kiwango kizuri, wakishinda michezo yote mitano ya Ligi Kuu waliyocheza hadi sasa, sambamba na ushindi katika mechi zao mbili za Ligi ya Mabingwa Afrika.
Azam FC, kwa upande wao, wameanza msimu kwa kudondosha pointi nne, lakini rekodi yao dhidi ya Simba inatoa picha kwamba mchezo wa leo unaweza kuwa tofauti kabisa na mwenendo wa timu hizo katika msimu.
Rekodi ya hivi karibuni haitoi mbabe
Katika michezo 10 ya mwisho ya Ligi Kuu kati ya Simba na Azam, hakuna timu iliyotawala kwa kiwango kikubwa.
Simba imeibuka mshindi mara tatu, Azam FC imeshinda mara mbili, wakati michezo mitano imekwisha kwa sare.
Mchezo wao wa mwisho wa ligi ulikuwa Aprili 5, 2026, ulipomalizika kwa sare tasa ya 0-0 kwenye Uwanja wa Azam Complex.
Hata hivyo, Azam Fc wana kumbukumbu nzuri zaidi ya kukutana na Simba katika msimu uliopita baada ya kupata ushindi wa 2-0 ugenini Desemba 7, 2025.
Historia hiyo inaifanya Mzizima Derby ya leo kuwa mchezo ambao hautegemei pekee mwenendo wa timu kwenye msimamo wa ligi.
Kocha Mkuu wa Simba, Steve Barker, amesisitiza umuhimu wa mchezo huo licha ya timu yake kuwa na muda mfupi wa kujiandaa baada ya mchezo uliopita.
Barker alisema benchi lake linafahamu changamoto ya muda mfupi wa maandalizi, lakini hilo halibadilishi umuhimu wa mchezo huo katika mipango yao ya msimu.
Kocha huyo amesema Simba inalenga kushinda ili kuendelea kulinda malengo yake ya msimu, huku akirejea namna timu hiyo ilivyopoteza jumla ya pointi nne dhidi ya Azam msimu uliopita.
Mchezo wa hesabu na presha
Mzizima Derby ya leo inakuja ikiwa na mchanganyiko wa rekodi za kihistoria, ubora wa sasa wa Simba na hamu ya Azam FC kutumia uwanja wao kupata matokeo.
Kwa Simba, ushindi utaendelea kuipa nafasi ya kujenga mwanzo mzuri wa msimu na kulinda hesabu zake za ubingwa. Kwa Azam Fc, mchezo huo ni fursa ya kuonyesha kuwa tofauti ya matokeo ya mwanzo wa msimu si lazima ionekane katika dabi.
Ni dakika 90 pekee ndizo zitaamua nani atachukua pointi tatu katika moja ya dabi zinazovuta hisia kubwa jijini Dar es Salaam.
