Kocha Mkuu wa Simba SC, Steven Barker, ameweka wazi msimamo wake kuelekea mchezo dhidi ya FC 15 de Agosto de Akonibe, akitaka kikosi chake kiwe tayari kupambana na kutafuta ushindi licha ya kucheza bila mashabiki mchezo wa mkondo wa kwanza.
Simba inatarajiwa kukutana na timu hiyo kutoka Guinea ya Ikweta katika mchezo wa kwanza wa Ligi ya Mabingwa Afrika, utakaochezwa Jumatano, Oktoba 21, saa 9 jioni kwenye Uwanja wa Uhuru, Dar es Salaam.
Hata hivyo, mchezo huo unatarajiwa kuchezwa bila mashabiki kufuatia ombi lililotolewa na wawakilishi wa 15 de Agosto wakati wa maandalizi ya mechi hizo mbili.
"Uwepo wa mashabiki ni sehemu muhimu ya nguvu ya Simba, hasa katika michezo mikubwa ya kimataifa inayohitaji ari, kujituma na kujiamini kwa wachezaji"
"Wanasimba wamekuwa na mchango mkubwa katika kuipa timu hii hamasa inapokuwa uwanjani, hivyo kutokuwepo kwao kutakuwa changamoto kidogo lakini hali hiyo haitabadilisha dhamira yetu ya kupigania matokeo mazuri," alisema
Licha ya kutoridhishwa na uwezekano wa kucheza mbele ya viti visivyo na mashabiki, Barker amewataka wachezaji wake waelekeze nguvu zao katika kutekeleza majukumu yao ndani ya uwanja badala ya kuruhusu mazingira ya mchezo kuathiri maandalizi yao.
Simba inaingia katika hatua hii ikiwa na matokeo mazuri kutoka raundi iliyopita, baada ya kuiondoa Mighty Wanderers ya Malawi kwa jumla ya mabao 7-1.
Katika mchezo wa kwanza uliochezwa ugenini Septemba 6, Wekundu wa Msimbazi walipata ushindi wa bao 1-0 kabla ya kuendeleza ubabe wao katika mchezo wa marudiano kwa kuibuka na ushindi wa mabao 6-1.
Matokeo hayo yaliipa Simba nafasi ya kuendelea na safari yake ya Ligi ya Mabingwa Afrika, lakini sasa inakabiliwa na mtihani mpya dhidi ya 15 de Agosto.
