Ilikuwa ni Doumbia Day! Ndivyo unavyoweza kusema baada kusubiri kwa muda mrefu hatimaye mashabiki wa Simba leo wamemshuhudia mshambuliaji wao pendwa Ibrahim Doumbia akifungua akaunti ya mabao.
Ni katika ushindi wa mabao 6-1 ambao Simba wameupata dhidi ya 15 de Agosto kwenye mchezo wa mkondo wa kwanza kuwania tiketi ya kutinga hatua ya makundi michuano ya ligi ya mabingwa (CAFCL).
Kama ilivyo kawaida yao, vijana wa kocha Steve Barker walitawala mchezo huo na licha ya kufunga bao moja tu hadi mapumziko, ilikuwa ni suala la muda tu kwa 15 de Agosto kubebeshwa kapu la mabao.
Nathaniel Chilambo ndiye aliyefungua kalamu ya mabao mwishoni mwa kipindi cha kwanza akitumia makosa ya safu ya ulinzi ya 15 de AGosto.
Kipindi cha pili ndio balaa likawakumba 15 de Agosto wakishindwa kuhimili kasi ya Wana lunyasi ambao ni wazi kwa sasa wako katika kiwango bora wakionyesha dalili za kuwa na msimu wa mafanikio makubwa kwenye ligi ya mabingwa.
Lakini subira ya Wanasimba kwa Doumbia aliyeingia kipindi cha pili ikalipwa kwa staili ya aina yake, mshambuliaji huyo kutoka Mali akiweka kambani mabao mawili.
Bao la kwanza aliweza kumtoka mlinzi wa mwisho pamoja na mlinda lango kabla ya kufunga la pili akimalizia krosi ya Makgalwa ambaye pia alifunga bao moja kwenye mchezo huo.
Mabao mengine ya Simba yalifungwa na Elie Mpanzu na Anicet Oura huku de Agosto wakipata bao la kufutia machozi dakika za lala salama.
Unaweza kusema Simba tayari imetinga makundi baada ya ushindi huo wa kibabe kwani ili kufuzu de Agosto watahitaji kushinda 5-0 mchezo wa marudiano!
