Mshambuliaji wa Simba SC, Ibrahim Doumbia, amewashukuru mashabiki wa klabu hiyo kwa kuendelea kumuunga mkono licha ya kupitia kipindi kigumu cha kukosa mabao tangu alipojiunga na timu hiyo mwanzoni mwa msimu huu, akisisitiza kuwa sasa amefungua ukurasa mpya na kazi ya kutafuta mabao zaidi ndiyo inaanza.
Doumbia ametoa kauli hiyo baada ya kuibuka na mabao mawili katika ushindi wa mabao 6-1 ambao Simba iliupata dhidi ya 15 de Agosto ya Equatorial Guinea, katika mchezo wa raundi ya pili ya awali ya Ligi ya Mabingwa Afrika uliopigwa Uwanja wa Uhuru, Dar es Salaam.
Mabao hayo yalikuwa ya kwanza kwa mshambuliaji huyo akiwa na jezi ya Simba, baada ya kusubiri kwa muda mrefu akitafuta nafasi ya kuonesha uwezo wake wa kufumania nyavu.
Akizungumzia kipindi alichopitia bila kufunga, Doumbia amekiri kuwa ilikuwa changamoto kubwa kwake, hasa akizingatia matarajio yaliyokuwepo baada ya kusajiliwa na Simba ili kuongeza nguvu katika safu ya ushambuliaji.
Mshambuliaji huyo amesema aliumia moyoni kila alipomaliza mchezo bila kufunga, akifahamu kuwa jukumu lake kubwa ni kusaidia timu kupata mabao na matokeo mazuri.
Hata hivyo, amesema hakukata tamaa kutokana na msaada alioupata kutoka kwa wachezaji wenzake, benchi la ufundi na viongozi wa klabu hiyo, ambao waliendelea kumtia moyo katika kipindi ambacho mambo hayakuwa yakimwendea vizuri.
“Wachezaji wenzangu walikuwa wananijenga kiakili na kunisaidia kuzingatia kazi yangu uwanjani badala ya kufuatilia yanayosemwa na watu. Benchi la ufundi na viongozi pia walinipa moyo wa kuendelea kupambana,” ameeleza Doumbia.
Ameongeza kuwa kufunga mabao mawili katika mchezo huo kumempa matumaini mapya na anaamini sasa amefungua mlango wa kufunga zaidi katika michezo inayofuata.
Aeleza presha aliyokutana nayo Tanzania
Doumbia amekiri kuwa maisha ya soka nchini Tanzania yamemfundisha mambo mengi mapya, akibainisha kuwa kiwango cha ushindani na presha inayowakabili wachezaji wa Simba ni tofauti na mazingira aliyoyazoea nchini Mali.
Amesema Simba ni klabu yenye wachezaji wenye viwango vya juu, huku Ligi Kuu Tanzania ikiwa na ushindani unaofanya matokeo ya mchezaji kuzungumziwa kwa kiasi kikubwa.
Amesema mchezaji anapofanya vizuri hupata sifa, lakini anapopitia kipindi kigumu, changamoto zake pia huwa wazi kwa mashabiki na wadau wa soka.
Hali hiyo iliongeza presha kwake baada ya kushindwa kufunga katika mechi mbili za awali za Ligi ya Mabingwa Afrika na michezo minane ya Ligi Kuu Bara aliyokuwa ameichezea Simba.
Pamoja na changamoto hizo, Doumbia amesema anaendelea kujifunza na kuzoea mazingira ya soka la Tanzania huku akijipanga kuboresha kiwango chake.
