Klabu ya Simba SC imetangaza rasmi ratiba ya uchaguzi mkuu wa viongozi wake unaotarajiwa kufanyika Januari 3, 2027, huku zoezi la uchukuaji fomu za kugombea nafasi mbalimbali za uongozi likianza Oktoba 30, 2026.
Ratiba hiyo imetangazwa na Kamati ya Uchaguzi ya Simba katika mkutano na waandishi wa habari uliofanyika mapema leo, ambapo kamati hiyo imeweka wazi hatua zote za uchaguzi, kuanzia uchukuaji na urejeshaji wa fomu, uhakiki wa wagombea, mapingamizi hadi kipindi cha kampeni na siku ya kupiga kura.
Mwenyekiti wa Kamati ya Uchaguzi ya Simba, Anderson Msumba, amesema lengo la mkutano huo ni kuwafahamisha wanachama na wadau wa klabu kuhusu utaratibu mzima wa uchaguzi.
“Kamati imekuja hapa mbele yenu kutoa utaratibu mzima kuanzia tangazo, kuchukua fomu, kurejesha, kupitisha wagombea, kampeni mpaka uchaguzi ambao utafanyika Januari, 2027,” amesema Msumba.
Uchukuaji Fomu Kuanza Oktoba 30
Akieleza ratiba ya uchaguzi, Makamu Mwenyekiti wa Kamati ya Uchaguzi ya Simba, Alpha Gervas, amesema uchukuaji wa fomu kwa wanachama wanaotaka kugombea nafasi mbalimbali za uongozi utaanza Oktoba 30 hadi Novemba 6, 2026.
Amesema kuanzia Novemba 7 hadi 11, 2026, itakuwa ni kipindi cha kurejesha fomu zilizochukuliwa, kabla ya kamati kuanza kuzikagua na kuzihakiki ili kubaini wagombea waliokidhi vigezo vilivyowekwa.
Kwa mujibu wa ratiba iliyotangazwa, hatua za uchaguzi zitakuwa kama ifuatavyo:
-
Oktoba 30 – Novemba 6, 2026: Uchukuaji wa fomu za kugombea.
-
Novemba 7–11, 2026: Urejeshaji wa fomu kwa kamati.
-
Novemba 12–14, 2026: Ukaguzi na uhakiki wa fomu za wagombea.
-
Novemba 15, 2026: Kutangazwa kwa majina ya wagombea waliokidhi vigezo na kufunguliwa kwa kipindi cha mapingamizi.
-
Novemba 17–18, 2026: Kupokea mapingamizi dhidi ya wagombea.
-
Novemba 19–21, 2026: Kupitia mapingamizi na kuandaa hati za wito kwa wahusika.
-
Novemba 23–25, 2026: Kusikiliza mapingamizi.
-
Novemba 26–27, 2026: Hatua ya kutoa maamuzi kuhusu mapingamizi.
-
Novemba 30, 2026: Kutangaza majina ya mwisho ya wagombea waliofuzu.
Gervas amesema baada ya kukamilika kwa hatua hizo, kampeni za uchaguzi zitaanza Desemba 3, 2026 na kuendelea hadi Januari 2, 2027, siku moja kabla ya uchaguzi mkuu.
Uchaguzi Kufanyika Januari 3, 2027
Kamati hiyo imeeleza kuwa uchaguzi huo unafanyika kwa kuzingatia Katiba ya Simba ya mwaka 2018, iliyofanyiwa marekebisho mwaka 2025 na kusajiliwa Februari 2026.
Kwa mujibu wa maelezo yaliyotolewa katika mkutano huo, ibara ya 26 ya katiba ya klabu inaelekeza uchaguzi kufanyika kila baada ya miaka minne.
Aidha, kamati imeeleza kuwa kanuni za uchaguzi za klabu pamoja na zile za Shirikisho la Soka Tanzania (TFF) zinahitaji kutolewa kwa tangazo na utaratibu wa uchaguzi ndani ya siku 60.
Msumba amesema uchaguzi wa mwisho wa Simba ulifanyika Januari 2023, hivyo kipindi cha uongozi wa sasa kinaelekea ukomo wake Januari 2027.
Nafasi saba za uongozi, moja lazima awe Mwanamke
Katika mkutano huo, mjumbe wa Kamati ya Uchaguzi ya Simba, Richard Mwalibwa, ameeleza vigezo vya wanachama wanaotaka kugombea nafasi za uongozi kwa mujibu wa ibara ya 27 ya katiba ya klabu.
Mwalibwa amesema kuna nafasi saba za uongozi zinazohusika, ambapo nafasi tano zitagombewa kupitia uchaguzi, huku nafasi mbili zikijazwa kwa uteuzi unaofanywa na mwenyekiti atakayechaguliwa.
Amefafanua kuwa mgombea wa nafasi ya mwenyekiti anatakiwa kuwa na shahada ya chuo kikuu, wakati katika nafasi tano zinazogombewa, angalau nafasi moja lazima ijazwe na mwanamke.
Kwa upande wa nafasi nyingine za uongozi, amesema mahitaji ya elimu yanatofautiana, huku baadhi ya nafasi zikiruhusu mgombea mwenye elimu ya kidato cha nne.
Aidha, Mwalibwa amesema mgombea anatakiwa kuwa na umri wa miaka 25 hadi 65, kuwa mwanachama wa Simba na kuwa na angalau miaka mitatu tangu kupata kadi ya uanachama.
Vigezo hivyo vinatarajiwa kuwa mwongozo kwa wanachama watakaojitokeza kuchukua fomu za kuwania nafasi mbalimbali za uongozi wa klabu hiyo.
