Klabu ya Simba SC imeandika historia kubwa katika soka baada ya kufikisha ushindi 20 mfululizo katika michezo ya Ligi Kuu Tanzania Bara, kufuatia ushindi wa mabao 3-2 dhidi ya Namungo FC katika mchezo uliopigwa jana kwenye Uwanja wa Uhuru, Dar es Salaam.
Ushindi huo umeifanya Simba mechi 20 za ushindi mfululizo, na kwa mujibu wa Mwenyekiti wa Bodi ya Wakurugenzi ya klabu hiyo, Crescentius Magori, mafanikio hayo yanaivuka rekodi ya ushindi 19 mfululizo iliyokuwa ikishikiliwa na Bayern Munich.
Matokeo hayo dhidi ya Namungo yamekuwa sehemu ya historia muhimu kwa Wekundu wa Msimbazi, ambao wameendelea kuonesha mwendelezo wa matokeo mazuri katika Ligi Kuu Tanzania Bara.
Akizungumza kuhusu mafanikio hayo, Magori amesema klabu imefikia hatua kubwa inayopaswa kujivunia, huku akiwapongeza wachezaji kwa kujituma na mashabiki kwa kuendelea kutoa sapoti kubwa kwa timu hiyo.
Amesema rekodi hiyo ni ushahidi wa kazi kubwa inayofanywa na kikosi cha Simba, benchi la ufundi na uongozi wa klabu, lakini amesisitiza kuwa mafanikio hayo hayapaswi kuwafanya wajisahau.
Magori amebainisha kuwa ligi bado ina safari ndefu, kwani haijafika hata mwisho wa mzunguko wa kwanza, hivyo timu inapaswa kuendelea kupambana kwa umakini na kutokubweteka kutokana na rekodi iliyowekwa.
Kwa upande wake, Kocha Mkuu wa Simba SC, Steve Barker, amesema kufikisha ushindi 20 mfululizo ni mafanikio makubwa ambayo hayajapatikana kwa urahisi, akieleza kuwa timu imeweka alama muhimu katika historia ya klabu.
Barker amefafanua kuwa ushindi huo unatokana na michezo 10 ya mwisho ya msimu uliopita pamoja na mechi 10 za msimu huu, jambo linaloonesha mwendelezo wa kiwango kizuri na uwezo wa wachezaji kupambana katika kila mchezo.
Kocha huyo amesisitiza kuwa mafanikio hayo ni matokeo ya kazi ya pamoja, nidhamu na juhudi zinazofanywa na wachezaji pamoja na benchi la ufundi.
Ameongeza kuwa rekodi hiyo ina umuhimu wa kipekee kutokana na Simba kutimiza miaka 90 tangu kuanzishwa kwake mwaka huu, hivyo wanataka kuufanya mwaka huo kuwa wa kipekee kwa kuweka alama kubwa katika historia ya klabu.
