Kocha Mkuu wa Simba Steve Barker amewapongeza wachezaji wa timu hiyo kwa kupambana kuibuka na ushindi wa mabao 3-2 dhidi ya Namungo Fc katika mchezo ambao Simba ilihitaji dakika 11 za mwishoni kusawazisha na kufunga bao la ushindi.
Barker amesema zipo changamoto ambazo wanahitaji kuzifanyia kazi wakati huu ambao ligi inasimama kupisha kalenda ya FIFA.
Barker ametaja changamoto hizo ni eneo la safu ya ulinzi na timu kupoteza umiliki wa mchezo hasa baada ya dakika 45.
"Naawapongeza wachezaji wangu, tulilazimika kupambana kupata ushindi huu, haikuwa mechi rahisi kwetu. Tunapaswa kufanyia kazi maeneo yaliyoonyesha mapungufu"
"Mapumziko ya ligi yamekuja wakati sahihi kwani tuna nafasi ya kurekebisha mapungufu yaliyojitokeza katika michezo ya hivi karibuni, hasa kushindwa kudhibiti mchezo na makosa ya kiulinzi"
"Tumekuwa tukianza vizuri michezo lakini tunapoteza mwelekeo baada ya dakika 30 hadi 45, hali inayowapa wapinzani nafasi ya kurejea mchezoni. Lazima tuboreshe umiliki wa mpira na uimara wa safu ya ulinzi kabla ya michezo ijayo," alisema Barker
Katika mchezo dhidi ya Namungo Fc, kukosekana kwa beki Ismail Toure ilionekana dhahiri kuipa changamoto Simba kwenye safu ya ulinzi Barker akimuanzisha beki kinda Ibrahim Nindi.
