Kocha Mkuu wa Simba Steve Barker amesema anaamini muda wa mapumziko aliyowapa wachezaji wake unatosha kurejesha miili yao katika hali bora kabla ya kuendelea na maandalizi kuelekea mechi zinazofuata ligi kuu na ligi ya mabingwa.
Baada ya ushindi wa mbao 3-2 dhidi ya Namungo Fc, Barker alitoa wiki moja kwa wachezaji wake kumpumzika ambapo kikosi cha Wekundu hao wa Msimbazi kinatarajiwa kurejea mazoezini siku ya Jumatatu.
“Mapumziko haya ni muhimu kwetu kwa sababu yanatupa nafasi ya kuangalia tulipotoka na tunakokwenda."
"Tunataka kutumia muda huu kufanya kazi kwenye maeneo yanayohitaji maboresho, kuhakikisha wachezaji wanakuwa katika hali nzuri na tunarejea tukiwa tayari kwa changamoto zinazotukabili. Tunajua michezo ijayo haitakuwa rahisi, hivyo tunahitaji maandalizi bora,” alisema Barker
Kwa mujibu wa ratiba, mchezo unaofuata wa Simba ni dhidi ya JKT Tanzania ukiwa ni wa ligi kuu utakaopigwa uwanja wa Isamuhyo, Novemba 21.
Baada ya mchezo huo, Simba itaelekeza nguvu zake kwenye ligi ya mabingwa hatua ya makundi ikitarajiwa kuanza na Orlando Pirates nyumbani.
Barker atakuwa na takribani siku 10 za kukiweka sawa kikosi chake tayari kwa awamu nyingine ya ushindani Simba ikilenga kuendeleza rekodi ya ushindi wa asilimia 100.
