Uongozi wa klabu ya Simba SC umepokea kwa furaha uamuzi wa Shirikisho la Soka Afrika (CAF) wa kuupitisha Uwanja wa Uhuru kuwa uwanja wa nyumbani kwa timu hiyo katika mechi za Hatua ya Makundi ya Ligi ya Mabingwa Afrika (CAFCL), licha ya kuwekewa sharti la kuingiza idadi ndogo ya mashabiki 6,000 pekee.
Hatua hiyo inakuja kama afueni kubwa kwa Wekundu wa Msimbazi ambao walikuwa hatarini kulazimika kucheza michezo yao ya nyumbani nje ya Jiji la Dar es Salaam, ikiwemo uwezekano wa kukimbilia visiwani Zanzibar katika Uwanja wa New Amaan Complex, kufuatia kufungwa kwa Uwanja wa Mkapa kwa ajili ya matengenezo kuelekea fainali za AFCON 2027.
Akizungumzia uamuzi huo, Meneja wa Habari na Mawasiliano wa Simba, Ahmed Ally, amebainisha kuwa klabu hiyo imepokea taarifa hizo kwa mikono miwili kwani kubaki Dar es Salaam kunawapa faida kubwa ya kiufundi na kisaikolojia.
"Ni kweli tumepokea barua kutoka CAF ikiruhusu utumiaji wa Uwanja wa Uhuru. Licha ya kwamba uwezo wa uwanja umezuiwa kuingiza mashabiki wasiozidi 6,000 kutokana na mapendekezo ya kiusalama na miundombinu, kwetu sisi hili ni jambo la heri. Kubaki Dar es Salaam, mbele ya mashabiki wetu, ni silaha tosha," alisema Ahmed.
Ahmed amesema baada ya kupokea taarifa hiyo, watazungumza na Wanasimba, kuweka mkakati kabambe wa hamasa ili kuhakikisha lengo la kushinda mechi zote kwenye uwanja huo linafanikiwa.
Simba SC inatarajia kuanza kampeni yake ya hatua ya Makundi (Kundi C) mwishoni mwa mwezi huu wa Novemba kwa kuwakaribisha miamba wa Afrika Kusini, Orlando Pirates, katika mchezo unaotarajiwa kuwa wa vuta nikuvute, kabla ya kumenyana na timu nyingine za RS Berkane ya Morocco na Colombe Sportive ya Cameroon.
