Kocha Mkuu wa Simba Steve Barker amesema kikosi chake kiko tayari kwa mchezo wa ligi kuu dhidi ya JKT Tanzania utakaopigwa kesho Jumamosi, Novemba 21 katika uwanja wa Isamuhyo, Mbweni.
Akizungumzia maandalizi kuelekea mchezo huo, Barker amesema ametumia vyema mapumziko ya kalenda ya FIFA akiamini vijana wake wako tayari kuendeleza wimbi la ushindi.
Hata hivyo Barker amesema anatambua JKT Tanzania ni timu ngumu hivyo watachukua tahadhari ili kuhakikisha wanapata ushindi.
"Maandalizi yanakwenda vizuri na tulianza kufanya hivyo wakati wa kalenda ya FIFA. Tunahitaji kuingia kwenye mchezo huu na umakini mkubwa."
"Lengo letu ni kupata ushindi ili kuendeleza matokeo mazuri tuliyokuwa nayo kabla ya mapumziko ya ligi," alisema Barker.
Akizungumza kwa niaba ya wachezaji wenzake, kiungo Hussein Semfuko amesema kila mechi kwao ni muhimu na wanakwenda kupambania alama tatu.
"Wachezaji tumejipanga vizuri kwa ajili ya kuzipambania pointi tatu. Kila mechi kwetu ni muhimu kupata pointi tatu licha ya ugumu wa mpinzani."
"Tunahitaji kushinda ili kuhakikisha msimu huu tunatimiza malengo ya kutwaa ubingwa," alisema Semfuko