Ligi Kuu ya NBC inaendelea leo kwa mechi nyingine ya kiporo kupigwa mkoani Tabora ambao wenyeji Tabora United wataikaribisha Simba katika mchezo utakaopigwa uwanja wa Ali Hassan Mwinyi
Baada ya kuzoa alama tatu mkoani Kigoma katika mchezo dhidi ya Mashujaa Fc, Wekundu wa Msimbazi leo wataingia dimba la Ali Hassan Mwinyi wakiwa na malengo yaleyale ya kuvuna alama tatu
Kikosi cha kocha Abdelhak Benchikha kilitua Tabora juzi usiku na jana kufanya mazoezi ya mwisho katika uwanja wa Ali Hassan Mwinyi
Ni wazi mchezo utakuwa mgumu, Tabora United wamejipambanua kuwa moja ya timu ngumu msimu huu hasa wanapocheza katika uwanja wao wa nyumbani
Katika mkutano na wanahabari jana, Kocha Msaidizi wa Simba Seleman Matola alisema wanafahamu aina ya mechi wanakwenda kukabiliana nayo leo, wamejipanga na watahakikisha wanavuna alama zote tatu
Ushindi dhidi ya Tabora United leo utaisogeza Simba karibu zaidi na waliojuu kwenye msimamo wa ligi
Simba inashika nafasi ya tatu katika msimamo wa ligi ikiwa na alama 26, Azam Fc wako nafasi ya pili wakiwa na alama 31 na Yanga wanaongoza wakiwa na alama 34. Hata hivyo Simba ina mechi mbili za viporo
