Jana klabu ya Simba ilithibitisha kumuuza beki Hennock Inonga Baka kwenda klabu ya FAR Rabat inayoshiriki Ligi Kuu ya Morocco
FAR Rabat wamelazimika kununua mkataba wa mwaka mmoja ambao Inonga alikuwa amebakisha na Simba baada ya jaribio la beki huyo kutaka kuvunja mkataba wake 'kienyeji' kukwama
Kupitia dili hilo, Simba inatajwa kuvuna takribani Tsh Milioni 500, fedha ambazo pasipo na shaka zitatosha kushusha beki mwingine wa daraja la juu kuchukua nafasi yake
Tayari Simba ilishaanza mapema msako wa kutafuta beki mpya wa kati ikiendelea na mazungumzo na mabeki wa maana kuungana na Lameck Lawi ambaye tayari Simba imemsajili kutoka Coastal Union
Inonga ni miongoni mwa wachezaji waliofanya vizuri katika michuano ya Afcon iliyopita akiwa na kikosi cha DR Congo, jambo lililosababisha timu mbalimbali kutamani huduma yake msimu ujao.
Akiwa Simba, Inonga ambaye alijiunga na timu hiyo Agosti 2021 amekuwa mchezaji muhimu katika eneo la beki wa kati akiingia kikosi cha kwanza moja kwa moja huku akifanikiwa kufunga mabao matano ndani ya Ligi Kuu.
Beki huyo anakumbukwa na wana Simba alipofunga bao kwa kichwa dakika ya pili dhidi ya Yanga pale Wekundu hao waliposhinda kwa mabao 2-0 katika mchezo wa Ligi Kuu Bara uliochezwa Uwanja wa Benjamin Mkapa, Aprili 16, 2023.
Mbali na kufanya mazuri ndani ya Simba ikiwemo kuisaidia kushinda Ngao ya Jamii msimu uliopita (2023-2024), lakini dakika za mwisho mwisho mwa msimu uliopita Inonga hakuwa na maelewano mazuri na uongozi wa klabu hiyo baada ya kuingia kwenye mgogoro wa kimkataba ambapo mwenyewe alidai unamalizika Juni 30, 2024 ilhali Simba wakisema utamalizika Juni 30, 2025.
