Leo Simba inafungua pazia la michuano ya Kimataifa kwa kuikabili Al Ahli Tripoli katika mchezo wa mkondo wa kwanza raundi ya pili ya michuano ya kombe la Shirikisho la CAF
Ni msimu mwingine kwa Simba kuendeleza rekodi yake ya kibabe katika mashindano ya CAF
Baada ya maboresho makubwa na kikosi na ujio wa benchi jipya la ufundi, kocha Fadlu Davids na vijana wake leo wanakwenda kujaribiwa na wajukuu wa hayati Kanali Muammar Gaddafi katika uwanja wa Juni 11
Ni wazi itakuwa mechi ngumu ambayo inazikutanisha timu zenye malengo yanayofanana
Kwa Simba kucheza hatua ya makundi katika mashindano ya CAF ni jambo la kawaida kwani katika miaka sita wametinga makundi mara tano na kucheza robo fainali nne mfululizo
Al Ahli Tripoli nao wamekuwa na mwenendo mzuri katika ushiriki wao wa kombe la Shirikisho kwani mwaka 2022 walifanikiwa kucheza hatua ya nusu fainali na mara kadhaa wamecheza ligi ya mabingwa na kuwahi kufika robo fainali pia
Dimba la Juni 11 litakuwa 'full house' kwani Al Ahli Tripoli wameuza tiketi zote za mchezo huo ambapo takribani mashabiki 60,000 watakuwa uwanjani kushuhudia mchezo huo
Mkufunzi wa Simba Fadlu Davies amesema kikosi chake kiko tayari kwa mchezo huo, hii sio mara ya kwanza kwa Simba kucheza mechi yenye presha kubwa ugenini
Fadlu amesema watapambana kuhakikisha wanapata matokeo mazuri lakini jambo la ambalo ana uhakika nalo ni kuwa mechi itamalizikia jijini Dar es salaam
Ni wazi Simba itacheza kwa tahadhari kubwa leo, ili kuhakikisha inashinda au hata kupata sare ili mechi ya nyumbani kusiwe na kazi kubwa ya kufanya
Simba imejijengea heshima kubwa katika soka la Afrika yanapokuja mashindano ya CAF iwe ligi ya mabingwa au kombe la Shirikisho
Hivyo bila shaka, Mnyama leo atadhihirisha kwa nini anashika nafasi ya saba kwa ubora barani Afrika
