Shirikisho la Soka barani Ulaya, UEFA, limemtangaza rasmi kumfungia kiungo mshambuliaji wa Benfica Gianluca Prestianni, kufuatia tukio lililotokea katika mchezo wa kwanza dhidi ya Real Madrid kwenye michuano ya Ligi ya Mabingwa Ulaya.
Kwa mujibu wa taarifa rasmi ya UEFA, adhabu hiyo ni ya muda wakati uchunguzi wa kina ukiendelea kuhusu madai ya tabia isiyofaa iliyodaiwa kumlenga mshambuliaji wa Madrid, Vinícius Junior. Shirikisho hilo limesema hatua hiyo inalenga kulinda heshima ya mchezo pamoja na kuhakikisha usalama na utulivu kabla ya mchezo wa marudiano.
Kutokana na uamuzi huo, Prestianni hatakuwa sehemu ya kikosi cha Benfica kitakachocheza mchezo wa marudiano utakaopigwa katika dimba la Santiago Bernabéu jijini Madrid. Kukosekana kwake kunatajwa kuwa pigo kwa Benfica, hasa ikizingatiwa umuhimu wa mchezo huo katika kuamua hatma ya timu hizo kwenye mashindano hayo makubwa barani Ulaya.
Taarifa zinaeleza kuwa tukio hilo lilitokea mwishoni mwa mchezo wa kwanza uliokuwa na ushindani mkali na hisia kali kutoka kwa wachezaji na mashabiki. UEFA imesisitiza kuwa ina sera kali dhidi ya ubaguzi wa rangi na aina yoyote ya vitendo vinavyokwenda kinyume na maadili ya mchezo wa soka.
Kwa upande wake, klabu ya Benfica imeripotiwa kuonyesha kutoridhishwa na uamuzi huo na inaendelea kupitia taratibu za kisheria kuona kama kuna uwezekano wa kukata rufaa, ingawa muda ni mfupi kabla ya mchezo wa marudiano.
