Tanzania imepanda kwa nafasi moja katika viwango vya ubora vya vyama vya soka barani Afrika vinavyotolewa na Shirikisho la Mpira wa Miguu Afrika (CAF), kufuatia mafanikio ya klabu zake katika mashindano ya kimataifa.
Kwa mujibu wa tathmini ya hivi karibuni ya CAF ya miaka mitano, Tanzania sasa inashika nafasi ya tano barani Afrika, ikipanda kutoka nafasi ya sita iliyokuwa nayo hapo awali. Katika mabadiliko hayo, Tunisia iliyokuwa nafasi ya tano imeshuka hadi nafasi ya sita.
Viwango hivyo vya CAF hutokana na utendaji wa klabu za nchi husika katika mashindano ya Ligi ya Mabingwa Afrika na Kombe la Shirikisho Afrika kwa kipindi cha miaka mitano, ambapo matokeo ya misimu ya karibuni hupewa uzito mkubwa zaidi.
Kupanda kwa Tanzania kunachangiwa kwa kiasi kikubwa na mafanikio ya klabu zake, hususan Simba Sports Club na Young Africans Sports Club, ambazo zimekuwa zikifanya vizuri katika mashindano ya CAF na kufikia hatua za juu mara kwa mara.
Msimu huu Tanzania iliingiza timu nne hatua ya makundi kwa mara ya kwanza katika historia yake. Yanga na Simba ziliingia makundi ligi ya mabingwa wakati Azam Fc na Singida BS ziliingia makundi kombe la Shirikisho (CAF CC)
Mafanikio hayo yameiwezesha Tanzania kuongeza alama katika mfumo wa CAF, na hivyo kuboresha nafasi yake katika orodha ya ubora wa soka la vilabu barani Afrika.
Kupanda huku kunatarajiwa kuongeza hadhi ya soka la Tanzania kimataifa pamoja na kuihakikishia Tanzania kuwa na wawakilishi wengi katika mashindano ya CAF katika misimu ijayo.
