Mwamuzi wa kimataifa kutoka Kenya, Dickens Mimisa Nyagrowa, ameteuliwa rasmi kuchezesha mchezo wa fainali ya Kombe la Muungano kati ya Yanga na Simba utakaopigwa leo katika Uwanja wa New Amaan Complex, visiwani Zanzibar.
Nyagrowa atasaidiwa na waamuzi wasaidizi Ally Mbwana kutoka Zanzibar pamoja na Yusuph Shombe, pia kutoka Zanzibar. Nafasi ya mwamuzi wa akiba itashikiliwa na Ishaka Mwalile kutoka Tanzania Bara.
Akiwa na umri wa miaka 33, Nyagrowa ni mwamuzi mwenye uzoefu mkubwa katika soka la kimataifa, akiwa na beji ya FIFA. Katika taaluma yake, amewahi kuchezesha michuano mikubwa barani Afrika ikiwemo AFCON na CHAN.
Uteuzi wake katika fainali hii muhimu unaashiria imani kubwa iliyowekwa kwake na waandaaji wa mashindano hayo, huku mashabiki wa soka wakitarajia ushindani mkali baina ya wapinzani wa jadi, Yanga na Simba.
Mchezo wa fainali leo unatarajiwa kuwa wa kuvutia na wenye ushindani mkubwa, huku macho ya wengi yakielekezwa si tu kwa wachezaji, bali pia kwa waamuzi katika kuhakikisha haki inatendeka uwanjani.
