Nahodha wa timu ya taifa ya England, Harry Kane, ameandika historia mpya katika mashindano ya Kombe la Dunia baada ya kufikisha jumla ya mabao 10, hatua ambayo inamfanya alingane na rekodi ya gwiji wa zamani wa England, Gary Lineker.
Kane alifikia idadi hiyo ya mabao kufuatia mabao yake mawili katika mechi dhidi ya Croatia akiiongoza Uingereza kuanza vyema kampeni ya kulisaka kombe la Dunia kwa ushindi wa mabao 4-2.
Hatua hiyo imeweka jina lake sambamba na Lineker ambaye alifunga mabao 10 katika historia yake ya michuano ya Kombe la Dunia akiwa na Three Lions.
Rekodi hiyo ya Lineker imedumu kwa zaidi ya miongo mitatu, huku akijulikana sana kwa umahiri wake mbele ya lango hasa katika Kombe la Dunia la 1986 na 1990.
Kwa upande wake, Kane ameendelea kuthibitisha ubora wake kama mmoja wa washambuliaji tegemeo wa England katika kizazi cha sasa, akichangia mabao katika mashindano kadhaa ya Kombe la Dunia na kuongeza thamani yake katika historia ya timu hiyo.
Mashabiki wa soka wa England sasa wanasubiri kuona Kane akivunja rekodi hiyo na kujiweka peke yake kileleni kama mfungaji bora wa England katika historia ya Kombe la Dunia.
