Kikosi cha Simba SC kimewasili mkoani Morogoro tayari kwa mchezo wa Ligi Kuu Tanzania Bara dhidi ya Mtibwa Sugar utakaopigwa kesho Jumatano kwenye Uwanja wa Jamhuri.
Wekundu wa Msimbazi wanatarajiwa kushuka dimbani wakiwa na lengo moja kuu, kuondoka na alama tatu muhimu ili kuendeleza presha katika mbio za kuwania ubingwa wa ligi msimu huu.
Mchezo huo ni wa raundi ya 28 ya ligi, na ni mara ya pili kwa timu hizo kukutana msimu huu. Katika mzunguko wa kwanza uliopigwa Uwanja wa Meja Jenerali Isamuhyo, timu hizo ziligawana pointi baada ya kutoka sare ya bao 1-1.
Tangu mchezo huo, Simba imeonekana kubadilika kwa kiasi kikubwa chini ya kocha Steve Barker, ambapo timu hiyo haijapoteza mchezo wa ligi, huku ikiwa kwenye mfululizo wa ushindi wa mechi saba.
Kocha wa Simba, Steve Barker, ameendelea kuipa timu hiyo ubora wa kiuchezaji na matokeo chanya, hali inayoifanya Simba kuingia kwenye mchezo wa kesho ikiwa na morali kubwa na imani ya ushindi.
Simba ipo nyuma ya vinara Yanga kwa tofauti ya pointi mbili pekee, hivyo kila mchezo ulio mbele yao ni muhimu katika mbio hizo za ubingwa.
Simba ina nafasi ya kupanda kileleni endapo itashinda dhidi ya Mtibwa Sugar na wakati huohuo Yanga wakipoteza katika mchezo wao mgumu dhidi ya Azam FC.
Iwapo matokeo hayo yatatokea, Simba itachukua uongozi wa ligi na kuongeza presha kubwa katika hatua za mwisho za msimu huu.
Hata hivyo, Mtibwa Sugar haitakuwa mpinzani mwepesi, hasa ikizingatiwa wanapigania nafasi yao katika ligi na mara nyingi huonyesha upinzani mkali wanapocheza nyumbani.
