Nahodha wa Ureno, Cristiano Ronaldo, amerejea kwa kishindo katika Kombe la Dunia 2026 baada ya kufunga mabao mawili na kuiongoza Ureno kuibuka na ushindi mnono wa mabao 5-0 dhidi ya Uzbekistan.
Ronaldo, ambaye amekuwa akikosolewa na baadhi ya wadau wa soka kuhusu umri wake na uwezo wa kuendelea kucheza katika kiwango cha juu, alitoa jibu uwanjani kwa kuonyesha ubora wake mbele ya lango. Mabao hayo mawili yalimfanya kuongeza rekodi yake ya mabao katika mashindano makubwa ya kimataifa.
Baada ya mchezo huo, Ronaldo alisema: “Walisema ninapaswa kustaafu, lakini bado nipo hapa. Kelele kutoka nje zimekuwa hivyo siku zote, lakini hatuwezi kuzidhibiti. Tunaendelea kupambana na tupo pamoja kama timu.”
Mbali na ushindi huo mkubwa, Ronaldo ameandika historia nyingine kwa kuwa mchezaji wa kwanza kufunga bao katika matoleo sita tofauti ya Kombe la Dunia. Rekodi hiyo imeongeza sura mpya katika safari yake ya kipekee ya soka iliyodumu kwa zaidi ya miongo miwili.
Ushindi dhidi ya Uzbekistan umeongeza matumaini ya Ureno katika mashindano hayo, huku Ronaldo akionyesha kuwa bado ana mchango mkubwa ndani ya kikosi licha ya kuwa miongoni mwa wachezaji wenye umri mkubwa zaidi kwenye fainali hizo.
Kwa mara nyingine tena, nyota huyo ameonyesha kwa nini anatajwa miongoni mwa wachezaji wakubwa zaidi kuwahi kutokea katika historia ya soka duniani.
