Chelsea wamekamilisha makubaliano ya kumsajili beki wa pembeni wa Atalanta, Marco Palestra, katika moja ya dili kubwa za majira haya ya kiangazi. Taarifa zinaeleza kuwa pande zote zimefikia makubaliano ya mdomo, huku Atalanta wakitarajiwa kupokea zaidi ya euro milioni 55 pamoja na kipengele cha kunufaika na mauzo yajayo ya mchezaji huyo.
Palestra, mwenye umri wa miaka 21, anatarajiwa kusaini mkataba wa muda mrefu katika Uwanja wa Stamford Bridge na kuwa usajili wa kwanza wa kocha mpya wa Chelsea, Xabi Alonso, tangu achukue mikoba ya kuinoa klabu hiyo.
Chelsea wamefanikiwa kuiteka dili hilo katika hatua za mwisho licha ya Inter Milan kuonekana kuwa katika nafasi nzuri ya kumpata mchezaji huyo kwa muda mrefu. Hata hivyo, mazungumzo ya haraka yaliyofanyika ndani ya saa 24 zilizopita yalibadili mwelekeo wa usajili huo na kumshawishi Palestra kuichagua Chelsea.
Mbali na Inter Milan, vigogo wengine wa Ulaya wakiwemo Liverpool na Arsenal walikuwa wakifuatilia kwa karibu maendeleo ya beki huyo wa kimataifa wa Italia. Hata hivyo, Chelsea wameonyesha nguvu kubwa sokoni kwa kuwazidi wapinzani wao hao na kufanikisha usajili wa mmoja wa vipaji vinavyotajwa kuwa na mustakabali mkubwa zaidi katika soka la Italia.
Palestra ameonyesha kiwango bora akiwa Atalanta na anaonekana kuwa sehemu muhimu ya mradi mpya wa Xabi Alonso, ambaye anatarajiwa kufanya mabadiliko makubwa ndani ya kikosi cha Chelsea kuelekea msimu wa 2026/27. Uwezo wake wa kucheza kama wing-back wa kulia, pamoja na mchango wake katika kushambulia na kulinda, ulimfanya kuwa mmoja wa wachezaji waliotafutwa zaidi barani Ulaya.
Iwapo kila kitu kitaenda kama kilivyopangwa, Marco Palestra atakuwa nyongeza muhimu kwa Chelsea huku mashabiki wa klabu hiyo wakisubiri kuona kama usajili huo utakuwa mwanzo wa dirisha kubwa la usajili chini ya uongozi wa Xabi Alonso.
