Fc Barcelona imepiga hatua kubwa katika harakati za kumsajili kiungo mshambuliaji wa Borussia Dortmund, Karim Adeyemi, baada ya kufikia makubaliano binafsi na mchezaji huyo, huku mazungumzo kati ya klabu hizo mbili kuhusu ada ya uhamisho yakiendelea.
Kwa mujibu wa taarifa kutoka kwa waandishi nguli wa masuala ya usajili Fabrizio Romano na Gerardo Romero, Adeyemi ameonyesha wazi kuwa anataka kujiunga na Barcelona pekee katika dirisha hili la usajili. Inadaiwa tayari amekubaliana masharti ya mkataba binafsi na miamba hiyo ya La Liga, hatua inayoiweka Barcelona katika nafasi nzuri ya kukamilisha dili hilo.
Ripoti zinaeleza kuwa Barcelona tayari imewasilisha ofa rasmi kwa Borussia Dortmund, huku viongozi wa klabu hiyo ya Ujerumani wakifanya tathmini ya ofa hiyo kabla ya kutoa uamuzi. Mazungumzo yanaendelea kuhusu kiasi cha ada ya usajili, kwani Adeyemi bado ana mkataba unaomfunga Dortmund hadi mwaka 2027.
Kocha Hansi Flick anatajwa kuwa mmoja wa watu waliomsukuma zaidi Adeyemi kutua Camp Nou. Inaelezwa kuwa Flick amezungumza binafsi na nyota huyo wa Ujerumani kuhusu nafasi yake ndani ya kikosi na mradi wa Barcelona wa msimu ujao, jambo lililochangia mchezaji huyo kukubali kuhamia Catalunya.
Adeyemi, mwenye umri wa miaka 24, anasifika kwa kasi yake, uwezo wa kucheza pande zote mbili za winga pamoja na nafasi ya mshambuliaji wa kati. Barcelona inaamini kuwa atakuwa nyongeza muhimu katika safu ya ushambuliaji kuelekea msimu mpya.
