Nyota wa Barcelona na Timu ya Taifa ya Uhispania, Lamine Yamal, ameweka wazi kuwa hataki kutosheka na mafanikio makubwa aliyoyapata akiwa na umri mdogo, akisisitiza kuwa bado ana kiu ya kushinda mataji zaidi na kuandika historia katika soka. Yamal ameyasema hayo katika mahojiano na kituo cha Movistar.
Yamal amedai kuwa, licha ya kuwepo kwa wachezaji wakubwa kama Lionel Messi, Cristiano Ronaldo na Diego Maradona, ambao wameweka rekodi kubwa katika historia ya soka, haoni kama kuna mchezaji wa kizazi cha kisasa aliyefanikiwa kushinda mataji mengi akiwa na umri mdogo kama yeye. Hata hivyo, alimtaja pia Pelé kama mmoja wa wachezaji waliowahi kupata mafanikio makubwa akiwa kijana.
Akiwa na umri wa miaka 19, Yamal tayari amekuwa sehemu ya mafanikio makubwa ya Barcelona na Uhispania, huku akiongeza idadi ya mataji katika kipindi kifupi cha kazi yake. Ripoti ya Mundo Deportivo inaeleza kuwa tayari ameshinda mataji manane, yakiwemo mataji matatu ya La Liga, Euro na Kombe la Dunia, huku Champions League ikiwa moja ya changamoto kubwa iliyobaki kwenye orodha yake.
Licha ya mafanikio hayo, Yamal amesema hataki kupumzika wala kuridhika na alichofanikisha hadi sasa, bali anaona bado ana mambo mengi ya kutimiza kabla ya kufikia malengo yake. Kwa nyota huyo, jambo kubwa zaidi ni kuendelea kujenga jina lake na kuhakikisha anaacha alama itakayomfanya akumbukwe katika historia ya soka.
