Kocha Mkuu wa Tanzania Prisons, Shadrack Nsajigwa ‘Fuso’, amesema licha ya ushindani mkubwa unaotarajiwa katika msimu huu, anaamini kikosi hicho kina uwezo wa kupigania kurejea Ligi Kuu Bara msimu wa 2027/2028.
Nsajigwa amesema lengo lake kubwa ni kurejesha heshima ya Tanzania Prisons, ambayo ina maskani yake jijini Mbeya, na kuhakikisha timu hiyo inarejea katika nafasi yake ya kushiriki ligi ya juu nchini.
Akizungumza na Mwanaspoti, Nsajigwa amesema hatua ya kwanza ya kurejesha imani ya mashabiki ni kuhakikisha timu inapata matokeo mazuri uwanjani.
Amesema matokeo mazuri yatawafanya mashabiki kurejea kwa wingi kuisapoti timu, hasa katika michezo ya nyumbani, jambo ambalo litakuwa muhimu katika safari ya kupigania kupanda daraja.
Nsajigwa alijiunga na Tanzania Prisons Februari 27, 2026, akitokea Transit Camp, na kuchukua nafasi ya Mkenya Zedekiah ‘Zico’ Otieno, ambaye aliondoka klabuni hapo Februari 25, 2026, kufuatia matokeo yasiyoridhisha.
Kocha huyo ana historia kubwa na Tanzania Prisons, kwani aliwahi pia kuitumikia timu hiyo kama mchezaji, kabla ya kucheza na Yanga SC na kuichezea timu ya Taifa ya Tanzania, Taifa Stars.
Katika msimu wa 2025/2026, Nsajigwa aliiongoza Tanzania Prisons katika hatua za mwisho za Ligi Kuu Bara, ambapo timu hiyo ilimaliza katika nafasi ya 13 ikiwa na pointi 32.
Matokeo hayo yaliifanya Prisons kwenda kwenye Play-Off ya kushuka daraja, ambapo ilikutana na Mbeya City, iliyomaliza nafasi ya 14 ikiwa na pointi 30.
Katika hatua hiyo, Tanzania Prisons iliondolewa baada ya Mbeya City kushinda kwa jumla ya mabao 2-0, hivyo kulazimisha Prisons kucheza Play-Off nyingine ya kuwania nafasi ya kubaki Ligi Kuu.
Safari hiyo ya kujaribu kujiokoa iliendelea dhidi ya Polisi Tanzania, ambayo ilikuwa imeiondoa Mbeya Kwanza kwa jumla ya mabao 7-1.
Hata hivyo, Tanzania Prisons haikuweza kuendelea katika mapambano hayo baada ya kufungwa na Polisi Tanzania kwa jumla ya mabao 4-1, matokeo yaliyoifanya timu hiyo kushuka daraja.
Sasa, baada ya kushuka daraja, Nsajigwa amebeba jukumu la kuijenga upya Tanzania Prisons na kuiongoza katika harakati za kutafuta tiketi ya kurejea Ligi Kuu.
Kocha huyo anatarajiwa kukabili ushindani mkubwa katika msimu huu, lakini amesisitiza umuhimu wa kuanza kwa kujenga timu yenye uwezo wa kupata matokeo na kurejesha imani ya mashabiki.
Kwa Tanzania Prisons, msimu huu si wa kushiriki tu, bali ni safari ya kutafuta kurejea Ligi Kuu Bara na kurejesha heshima ya klabu hiyo yenye historia kubwa katika soka la Tanzania
