Kiungo mshambuliaji wa kimataifa wa Kenya na timu ya taifa ya Harambee Stars, Mohammed Bajaber, amerejea rasmi nchini Kenya baada ya kukamilisha uhamisho wa kujiunga na klabu ya Nairobi United FC.
Bajaber amejiunga na miamba hao wa Ligi daraja la kwanza la Kenya kama mchezaji huru, akisaini mkataba wa miaka miwili.
Nyota huyo alikuwa bila klabu tangu mwezi Julai mwaka huu baada ya kuachana na miamba wa soka nchini Tanzania, Simba SC, kwa makubaliano ya pande mbili.
Kipindi chake akiwa na Wekundu wa Msimbazi kiligubikwa na changamoto za majeraha ya mara kwa mara yaliyomzuia kuonyesha cheche zake uwanjani.
Uamuzi wa Bajaber kujiunga na Nairobi United umeleta mshangao mkubwa katika soka la Kenya. Ripoti za ndani zinasema kuwa mchezaji huyo amepiga chini ofa nono kutoka kwa mabingwa watetezi wa Ligi Kuu ya Kenya (FKFPL), Gor Mahia FC, waliokuwa wakipambana vikali kupata saini yake ili kuongeza nguvu kwenye kikosi chao.
Kurejea kwa mchezaji huyo mwenye kipaji kikubwa nchini Kenya kunatajwa kama mapinduzi makubwa kwa Nairobi United, ambayo ina malengo ya dhati ya kupanda daraja kwenda Ligi Kuu msimu huu.
Uzoefu wake wa kimataifa na uwezo wake wa kucheza nafasi kadhaa za ushambuliaji unatarajiwa kuwa chachu ya mafanikio kwa klabu yake hiyo mpya.
