Kaimu kocha wa Yanga SC, Simon Dladla, amesema timu hiyo inalenga kurejea katika ubora wake na kuhakikisha inapata matokeo yanayotarajiwa kuelekea mchezo wao wa NBC Premier League dhidi ya Mashujaa FC, akisisitiza kuwa malengo makubwa ya klabu hiyo ni kumaliza ligi ikiwa nafasi ya kwanza.
Dladla amesema utekelezaji wa mabadiliko ya kimfumo na kimbinu katika mchezo ujao utategemea wachezaji watakaopatikana, lakini amewahakikishia mashabiki kuwa Yanga itashuka uwanjani kucheza soka la kuvutia na kwa ushindani mkubwa.
Ameongeza kuwa benchi la ufundi linatambua changamoto zilizopo na linaendelea kuzifanyia kazi ili kuimarisha timu. Akizungumza na mashabiki wa Yanga, maarufu kama Wananchi, Dladla amekiri kuwa timu hiyo iliwakatisha tamaa katika mchezo uliopita baada ya kushindwa kupata matokeo waliyokuwa wakiyatarajia.
Hata hivyo, amesema wameyabaini mapungufu yao na wamejipanga kufanya kazi kwa bidii ili kurekebisha hali hiyo.
“Kwa Wananchi, tunafahamu kuwa tuliwakatisha tamaa katika mchezo uliopita kwa sababu hatukupata matokeo tuliyokuwa tunayatarajia. Tumeyatambua mapungufu yetu na tutafanya kazi kwa bidii. Tunafahamu kuwa tuna deni kubwa kwenu. Tunadaiwa magoli, tunadaiwa soka zuri na kiwango cha juu cha ushindani kila tunaposhuka uwanjani,” amesema Dladla.
Kwa upande wake, kipa wa Yanga, Aboutwaleeb Mshery, amesema mchezo dhidi ya Mashujaa hautakuwa rahisi kutokana na ushindani ambao timu hiyo imekuwa ikiutoa katika Ligi Kuu.
Hata hivyo, amesisitiza kuwa wachezaji wa Yanga wamejipanga kupambana kwa juhudi zote ili kuhakikisha wanapata matokeo mazuri.
“Hautakuwa mchezo rahisi kwa namna ambavyo Mashujaa wanacheza. Ni timu ambayo imekuwa ikitoa ushindani mkubwa kwenye ligi. Nachoweza kuwahakikishia ni kwamba wachezaji tutapambana kwa juhudi zote ili tupate matokeo mazuri,” amesema Mshery.
Kauli za Dladla na Mshery zinaashiria dhamira ya Yanga kurekebisha mapungufu yaliyojitokeza katika mchezo uliopita na kurejesha imani ya mashabiki wake.
Kwa upande wa benchi la ufundi, kipaumbele ni kuboresha kiwango cha timu, kuongeza ufanisi wa ushambuliaji na kuhakikisha Yanga inaendelea kupambana kufikia malengo yake ya msimu.
