Yanga yaangukia kundi B, Simba kundi C CAFCL

Mabingwa wa soka Tanzania Bara, Young Africans (Yanga), wamepangwa kundi B huku watani wao wa jadi Simba SC wakiangukia kundi C katika droo ya hatua ya makundi ya Ligi ya Mabingwa Afrika (CAFCL) iliyofanyika nchini Misri.

Droo hiyo imeziweka timu hizo mbili kubwa za Tanzania katika makundi tofauti, huku kila moja ikikabiliwa na ushindani mkali katika harakati za kusaka tiketi ya kufuzu hatua ya robo fainali ya michuano hiyo.

Yanga Kundi B Pamoja na Zamalek

Yanga imepangwa kundi B pamoja na Club Africain ya Tunisia, MC Alger ya Algeria na Zamalek ya Misri.

Kundi hilo linatarajiwa kuwa na ushindani mkubwa kutokana na historia na uzoefu wa timu hizo katika mashindano ya soka barani Afrika.

Kwa Yanga, safari ya kusaka nafasi ya kufuzu robo fainali itahitaji matokeo mazuri katika michezo ya nyumbani na ugenini dhidi ya wapinzani wake watatu.

Simba Kundi C na Orlando Pirates, RS Berkane

Kwa upande wa Simba SC, wekundu wa Msimbazi wamepangwa kundi C pamoja na Orlando Pirates ya Afrika Kusini, RS Berkane ya Morocco na Colombe ya Cameroon.

Kundi hilo linawakutanisha Simba na wapinzani ambao baadhi yao ina historia ya kukutana nao katika mashindano ya klabu barani Afrika.

Simba itapata fursa ya kukutana tena na Orlando Pirates, ambayo ilikutana nayo katika hatua ya robo fainali ya Kombe la Shirikisho Afrika (CAFCC) misimu mitatu iliyopita.

Vilevile, itakutana na RS Berkane, ambayo ilicheza nayo fainali ya Kombe la Shirikisho Afrika msimu mmoja uliopita, hivyo kuifanya mechi hiyo kuwa miongoni mwa zinazoweza kuvuta hisia za mashabiki.

Timu nyingine katika kundi hilo ni Colombe ya Cameroon, ambayo kwa mujibu wa taarifa iliyotolewa haijawahi kushiriki hatua hiyo ya makundi hapo awali.