Arsenal imepata ushindi muhimu wa bao 1-0 dhidi ya Liverpool katika mchezo wa Ligi Kuu England uliopigwa kwenye dimba la Anfield, matokeo yanayoifanya kuendelea kuongoza msimamo wa ligi kwa tofauti ya pointi tatu mbele ya Manchester City.
Kai Havertz ndiye aliyekuwa shujaa wa Arsenal baada ya kufunga bao pekee la mchezo dakika ya 16, lililowapa The Gunners ushindi mkubwa ugenini dhidi ya wapinzani wao.
Ushindi huo una umuhimu wa kipekee kwa Arsenal, kwani umevunja kipindi cha miaka 14 bila kupata ushindi wa aina hiyo dhidi ya Liverpool katika dimba la Anfield.
Akizungumza baada ya mchezo huo, kocha Mikel Arteta alisema anajivunia wachezaji wake, akisisitiza kuwa si ushindi pekee uliomfurahisha, bali pia moyo wa kujituma, mshikamano na namna walivyopambana kuilinda nembo ya klabu.
Arteta alikiri kuwa Arsenal ilikuwa na bahati katika baadhi ya nyakati, lakini pia ilionyesha ubora wake katika muda muhimu wa mchezo.
Kuhusu nafasi ya kuwania ubingwa, Arteta alisema bado ni mapema kuzungumzia hilo, akisisitiza kuwa kwa sasa wanapaswa kufurahia ushindi huo mkubwa pamoja na wachezaji, benchi la ufundi na mashabiki wao.
Matokeo hayo yanaipa Arsenal nguvu zaidi katika mbio za ubingwa, huku Manchester City ikiendelea kuwa mpinzani wake wa karibu kwa tofauti ya pointi tatu.
