Yanga na Simba ni timu zenye upinzani wa asili, hizi timu zina utamaduni wake ambao uko tofauti sana na vilabu vingine vyenye upinzani wa jadi kote duniani
Ni hivi; ukiwa shabiki wa Simba ni haramu kuajiriwa pale Yanga lakini pia ni hivyo hivyo mtu wa Yanga hawezi kufanya kazi Simba
Viongozi wengi wameingia matatani kwa kushukiwa tu ni shabiki wa timu ya upande wa pili, hizi timu zinapendwa sana, mashabiki hawako tayari kufanya kazi na yeyote wa upande wa pili kuhofia hujuma
Mitandaoni, kumekuwa na maoni ya mashabiki wa Yanga ambao hawafurahii kile kinahofanywa na Msanii wa Muziki wa Kizazi Kipya Ommy Dimpoz ambaye anafahamika kuwa 'mnazi lialia' wa Simba
Dimpoz ni mwajiriwa wa GSM kama balozi, anafanya shughuli mbalimbali za kutangaza bidhaa za GSM. Huyu ni mwajiriwa wa GSM, sio Yanga
Lakini kwa kutumia kofia yake hiyo, kwa nyakati tofauti Dimpoz amepata nafasi ya kujumuika na viongozi waandamizi na hata wachezaji wa Yanga
GSM wanaidhamini Yanga, wameshiriki kusajili, na wanalipa mishahara ya wachezaji. Zipo nyakati wachezaji wanakutana na waajiriwa wengine wa GSM 'koridoni'
Mashabiki wameonyesha kutofurahishwa na uhuru ambao Dimpoz amepewa kwani mara nyingi ameonekana akiwa na wachezaji wa Yanga
Wananchi bado hawajasahau, kilichotokea kwa Morrison. Yapo maoni ya wengi ambao wanadhani GSM wanakosea sana
Kwa sababu huyu ni mshabiki wa Simba ambaye dakika yoyote anaweza kukutana na akina Mukoko, Kisinda, Fiston na nyota wengine hasa wa kigeni
Jimmy Kindoki ni mhamasishaji na Mwanachama maarufu wa Yanga yeye ameshauri GSM wangempa Dimpoz majukumu mengine ambayo hayatawaweka mashabiki katika shaka
"Mimi nishauri tu Ommy angepewa majukumu mengine kwasababu tayari wanayanga hawana imani nae tena"," aliandika Ommy katika ukurasa wake wa mtandao wa kijamii
Lakini pia wapo wanaoamini kuwa mchakato wa Mabadiliko ukikamilika haraka, utaondoa hizi changamoto
Kwa sasa GMS ni mhisani tu Yanga, ana biashara zake ambazo ni haki yake kuajiri mtu yeyote
Kama GSM akiwa mwekezaji Yanga, mambo haya hayatakuwepo kwani atafanya kazi sambamba na kampuni itakayoundwa na Wanayanga wenyewe
Wachezaji wote watakuwa chini ya umiliki mmoja na sintofahamu inayoonekana sasa haitakuwepo
