Safu ya ushambuliaji ya Yanga msimu huu imeshindwa kuwapa furaha mashabiki kutokana na mwenendo mbovu wa kuzifumania nyavu
Mabadiliko ya kumuondoa kocha Cedric Kaze yalikuwa ya pili kufanywa na uongozi wa Yanga yote ikiwa ni jitihada ya kusaka tiba ya changamoto zilizokuwepo
Ubutu wa safu ya ushambuliaji ndio kilio cha mashabiki jambo lililopelekea hata wengine kupoteza imani kwa baadhi ya washambuliaji kuwa hawakustahili kusajiliwa na Yanga
Mghana Michael Sarpong ndiye mhanga mkuu wa ukosoaji kasi yake ya kuzifumania nyavu ikiwa hairidhishi
Wakati Yanga ikinolewa na Zlatko Krmpotic, Sarpong alianza msimu vyema akifunga bao katika mchezo wa kwanza kabisa dhidi ya Tanzania Prisons
Hilo lilikuwa bao pekee alilofunga katika michezo mitano ambayo Krmpotic aliiongoza Yanga
Katika michezo 18 chini ya kocha Cedric Kaze, Sarpong alifunga mabao matatu tu pamoja na kuwa zipo nyakati alikosekana uwanjani kutokana na majeruhi
Washambuliaji wengine, Waziri Junior yeye alifunga bao moja wakati wa Kaze, Yacouba Songne ndiye mshambuliaji aliyeng'ara zaidi wakati wa Kaze, akifunga mabao matatu na kutoa pasi nne za mabao. Alifunga bao moja wakati wa Krmpotic
Fiston Abdulrazak yeye alitua katika usajili wa dirisha dogo na amefanikiwa kufunga bao moja
Katika michezo 11 iliyosalia kwenye ligi na kombe la FA, washambuliaji hawa wanapaswa kudhihirisha ubora wao ili mabosi wa Yanga wapate sababu ya kuendelea nao msimu ujao
Kama hakutakuwa na mabadiliko ni wazi panga kali la mwishoni mwa msimu linaweza kuwapitia
