Stars yachapwa 4-2 na Zambia

Licha kutangulia kufunga, timu ya Taifa ya Tanzania 'Taifa Stars' imeondoshwa kwenye michuano ya Cosafa baada ya kulazwa mabao 4-2 na Zambia katika mchezo wa nusu fainali uliopigwa Jumatano jioni.

Stars ilitangulia kupata bao la kuongoza kwenye dakika ya 14 mfungaji akiwa Erasto Nyoni aliyepiga mpira wa adhabu nje kidogo ya boksi la 18.

Stars ilicheza vizuri karibu dakika zote za kipindi cha kwanza lakini ni dhahiri uchovu pia kuumia kwa Erasto Nyoni wakati kipindi hicho kikielekea ukingoni kulitoa nafasi kwa Zambia kufunga mabao mawili ya haraka haraka.

Zambia ilitawala mchezo huo kwenye kipindi cha pili na kufanikiwa kupata mabao mengine mawili wakati Stars ilipata bao la pili dakika tano kabla ya mchezo kumalizika, Simon Msuva akiwa mfungaji.

Katika mchezo huo wachezaji wa Stars walionekana kupoteza umakini hasa dakika za mwisho za kipindi cha kwanza na mwanzoni mwa kipindi cha pili.

Pengine uchovu umechangia kwa kiasi kikubwa kwani Stars imecheza michezo mitano ndani ya siku 11 pekee wakati Zambia huo ulikuwa mchezo wao wa pili.

Stars itashuka dimbani keshokutwa Ijumaa kusaka nafasi ya tatu ambapo itacheza na timu itakayofungwa kwenye mchezo wa pili wa nusu fainali kati ya Zimbabwe na Lesotho.

Stars imetumia mashindano haya kujiandaa na mchezo wa kufuzu michuano ya Afrika kwa wachezaji wa ndani (CHAN) ikitarajiwa kucheza na Rwanda Julai 15.