Ni hivi Kamati ya Maadili ya TFF ilimfungia Makamu Mwenyekiti wa Yanga Fredrick Mwakalebela kwa makosa ambayo sio ya kwake binafsi
Yanga ilimtuma Mwakalebela kuzungumza na Wanahabari na kubainisha yote yaliyozungumzwa kwenye mkutano ule
Kama ni adhabu ilipaswa kupewa klabu ya Yanga na sio Mwakalebela kwani yeye alikuwa Mjumbe tu, na Mjumbe huwa 'hauwawi'
Lakini inashangaza kuona Kamati ya Maadili ya TFF imemshughulikia 'mjumbe' na kumuacha mwajiri wake ambaye ndiye aliyewakilishwa
Kupitia taarifa waliyotoa kwa Wanahabari jana, uongozi wa Yanga umeweka wazi kuwa Mwakalebela aliwasilisha kile alichotumwa na klabu hiyo kwa maana kama kuna makosa basi yawe ya Yanga
Uongozi wa Yanga unaamini adhabu hiyo imetolewa kama vitisho na kujaribu kuwafunga mdomo wasilalamikie yanayofanywa dhidi yao
Huu umekuwa utamaduni wa TFF, kuwashughulikia 'wale' wanaolikosoa Shirikisho hilo
Mwaka juzi ilitungwa kanuni ya mavazi na ikatumika dhidi ya aliyekuwa kocha wa Yanga Mwinyi Zahera ambaye alikuwa mkosoaji mkubwa wa TFF
Kanuni hiyo ilitumika kwake tu na haijawahi kutumika tena tangu yeye alipoondolewa Yanga
Mambo haya ya kuwafungia watu yamefanyika sana wakati wa utawala wa Rais wa sasa wa TFF Wallace Karia pengine kuliko wakati mwingine wowote
Kwa hakika hapa kuna jambo haliko sawa katika uongozi wa Karia
