Kaimu Kocha Mkuu wa Yanga Juma Mwambusi amesema ameona mabadiliko kwenye kikosi chake ukilinganisha na wakati alipokabidhiwa timu hiyo mwezi uliopita
Yanga iliachana na kocha Cedric Kaze mwezi uliopita baada ya mfululizo wa matokeo yasiyoridhisha
Kwa takribani wiki tatu, Mwambusi alijichimbia na vijana wake Kigamboni akiwafua kisawasawa baada ya kubaini hawakuwa 'fiti'
Baada ya mechi mbili za kujipima nguvu, mchezo mmoja ukiwa baina yao Jumamosi iliyopita, Mwambusi amesema vijana sasa wameiva
"Timu imeimarika sana, nimeona kupitia mchezo wa Jumamosi waliokutana wenyewe kwa wenyewe, naona kuna kitu kikubwa kimebadilika sana," Mwambusi alinukuliwa na gazeti la Mwanaspoti
"Changamoto ya kutengeneza nafasi na kumaliza ilikuwa ni kubwa sana, tumefanyia kazi hilo. Tuna wachezaji wazuri sana ambao wana kila sababu ya kutwaa ubingwa wa Ligi"
Juzi Yanga ilicheza mchezo mwingine wa kirafiki dhidi ya African Lyon, vinara hao wa ligi kuu wakiibuka na ushindi wa mabao 3-0 yaliyofungwa na Fiston Abdul Razak (p), Michael Sarpong na Paulo Godfrey
Aidha, Mwambusi amebainisha kuwa ameongeza wachezaji watatu kutoka timu ya vijana kwa ajili ya kuwajenga na kuwapa nafasi ya kujiamini
