Kaimu Kocha Mkuu wa Yanga Juma Mwambusi amesema matokeo ya sare ya bao 1-1 dhidi ya KMC ni machungu kwao lakini hawana budi kukubaliana nayo kwa kuwa ndivyo mpira wa miguu ulivyo
Huo ukiwa mchezo wake wa kwanza tangu akabidhiwe timu, Mwambusi aliwashuhudia vijana wake wakishindwa kupata ushindi mbele ya watoza ushuru wa Kinondoni katika mchezo ambao walihitaji zaidi ushindi
Akizungumzia tathmini ya mchezo huo, Mwambusi alisema vijana wake hawakucheza vile alivyotaka katika kipindi cha kwanza lakini mabadiliko ya mbinu waliyofanya katika kipindi cha pili yaliwarejesha mchezoni
"Mimi kama Mwalimu nimeyapokea matokeo haya (sare) kwa kuwa ndio ambayo Mwenye ez Mungu ametujaalia, lakini nilihitaji alama zote tatu. Katika kipindi cha kwanza tulicheza chini sana lakini unaona kwenye kipindi cha pili tulibadilika na kusawazisha bao baada ya dakika moja"
"Tulitengeneza nafasi zaidi ya tano nyingine zikiwa za wazi kabisa kama washambuliaji wetu wangekuwa makini pengine tungeondoka na ushindi. Nakiri baadhi ya wachezaji hawakuwa katika kiwango tulichotarajia lakini ndivyo mpira ulivyo tunajipanga kwa mchezo unaofuata," alisema Mwambusi
Bryson David ndiye aliyeitanguliza KMC kwa bao safi kabla ya Yacouba kusawazisha akiunganisha kwa kichwa mpira wa adhabu uliopigwa na Saido Ntibazonkiza
Ntibazonkiza atajilaumu kwa kushindwa kutumia nafasi mbili alizopata
Mchezo wa Yanga unaofuata ni dhidi ya Biashara United na itapigwa April 17
