'Basi tukutane kwa Mkapa Jumamosi ijayo halafu tutatukana tena hapohapo baada ya wiki mbili'
Ni kauli za mashabiki wa Yanga baada ya watani zao Simba kupangwa kucheza na Kaizer Chiefs katika mchezo wa robo fainali ya ligi ya mabingwa
Pale Afrika Kusini Kaizer Chiefs ni timu ya 'wazawa' kwa huku kwetu unaweza kuifananisha na Yanga kuwa timu ya Wananchi
Kule dabi yao ni dhidi ya Orlando Pirates 'mabwanyenye' ambao huku kwetu unaweza kuwafananisha na Simba
Chiefs ndio timu yenye mataji mengi zaidi Afrika Kusini wakishinda mataji 93 katika miaka 47
Wanatumia uwanja wa FNB ambao unachukua takribani mashabiki 94,000 kama isingekuwa corona, uwanja huo 'ungetapika' katika mchezo wao dhidi ya Simba
Mwaka jana Mkurugenzi wa Uwekezaji GSM ambaye ni Makamu Mwenyekiti wa Kamati ya Mashindano Yanga, Mhandisi Hersi Said alitembelea klabu hiyo katika mpango wa kujenga ushirikiano
Ni hivi karibuni tu Chiefs nao wakafika kuitembelea Yanga kujifunza mambo mbalimbali pamoja na kuimarisha ushirikiano hasa katika kukuza soka la vijana
Timu hizi zina rekodi zinazoshabihiana, kama ilivyo historia ya Afrika Kusini na Tanzania, basi ndivyo ilivyo Kaizer Chiefs na Yanga
