Afisa Mhamasishaji wa Yanga Antonio Nugaz amesema pamoja na mafanikio yanayoanza kuonekana baada ya uwekezaji wa GSM, Yanga bado inaendelea kuimarishwa
Nugaz amewataka wapenzi na wanachama wa Yanga waendelee kuiunga mkono timu yao kwani furaha ya kweli wanakaribia kuipata
"Bado hatujafika pale tunapopataka, yani kuna sehemu tukifika tutasema sasa tupo timamu. Wanachama na Mashabiki wa Yanga waendelee kutuunga mkono, mambo mazuri zaidi yanakuja," alisema
Akizungumzia mchezo dhidi ya Simba uliopigwa uwanja wa Benjamini Mkapa juzi Jumamosi na Yanga kuibuka na ushindi wa bao 1-0, Nugaz amesema ari, maarifa na upambanaji wa wachezaji vilipelekea kupatikana ushindi katika mchezo huo
Amesema Yanga hawakuwa na hofu kabisa kuelekea mchezo huo kwani walifahamu wataibuka na ushindi
"Simba wana kikosi kipana kwa mtazamo wao lakini sio kwetu, tuliwazidi kila kitu.Sisi tuna wachezaji ambao ukiwatuma kazi wanaenda kuifanya. Kama marefa wanachezesha kwa haki hata tukicheza nao mechi 60 tutawafunga," alitamba Nugaz
"Kocha wetu (Nabi) ni Mwalimu wa daraja la juu sana, ana upeo mkubwa, anajua madhaifu na uimara wa kila mchezaji na anajua kuwatumia vizuri. Watu hawakujua kama Zawadi Mauya anaweza kupangwa pamoja na Feisal na Mukoko"
Baada ya ushindi wa juzi Nugaz amesema wanajiandaa kwenda kuchukua ubingwa wa FA kule mkoani Kigoma akiwataka mashabiki kujitokeza kwa wingi kwenye mchezo utakaopigwa uwanja wa Lake Tanganyika Julai 25
