Leo haikuwa siku nzuri kwa Yanga

Kukosekana kwa Ibrahim Ajib na Obrey Chirwa kumeifanya Yanga ikose mbinu mbadala kwenye ushambuliaji dhidi ya vijana wa Mbao FC waliokuwa imara sana.

Chirwa na Ajib wana uwezo wa kukaa na mpira pamoja na mbinu za kuweza kuwatoroka walinzi wa timu pinzani na hivyo kutengeneza nafasi za kufunga mabao.

Amissi Tambwe ni mshambuliaji wa kati, ili aweze kufanya vizuri lazima apelekewa mipira huduma ambayo aliikosa leo.

Ajib ameukosa mchezo huo kwa kuwa anatumikia adhabu ya kadi tatu za njano lakini si hivyo kwa Chirwa. Yeye aliamua tu kuukosa mchezo huo. Anazo sababu zake za msingi tunaziheshimu

Yanga bado inakosa mbinu mbadala hasa inapocheza kwenye viwanja vyenye changamoto ya 'pitch'.

Umiliki wa mpira pamoja na upigaji pasi ulikuwa mbovu, haijapata kutokea.

Hata hivyo vijana wa Mbao FC wanastahili pongezi kwa kuonyesha kiwango cha hali ya juu, Kwa mpira ule wa kushambulia kwa kasi Mbao inaweza kuifunga timu yoyote hapo CCM Kirumba.

Kwa Yanga imekuwa siku mbaya 'ofisini' na ndio matokeo ya mpira wa miguu. Kuna siku za ushindi na furaha lakini pia kuna siku za kushindwa na huzuni.

Hakuna timu iliyowahi kuwa juu bila kushuka chini. Changamoto za kupoteza michezo zinasaidia wakati mwingine kuboresha mapungufu yanayojitokeza.

Tunawapa pongezi Mbao FC kwa kutupa somo leo, tunawasubiri kwenye mchezo wa marudio katika dimba la Uhuru.