Mshambuliaji Heritier Makambo ameeleza furaha yake baada ya kurejea Yanga huku akikiri kuwa Yanga ya sasa sio ile aliyotumikia miaka miwili iliyopita
Makambo aliitumikia Yanga kwa mara ya kwanza msimu wa 2018/19 akifunga mabao 22 katika mashindano yote
Mshambuliaji huyo aliyerejea akitokea klabu ya Horoya Ac, ni miongoni mwa wachezaji ambao wako kambini Morocco katika pre-season
"Namshukuru Mungu kwa kupata nafasi nyingine ya kuwa ndani ya Yanga, nawaambia mashabiki wasubiri kuona makubwa kwani tutapambana sana. Nimerejea nimekuta mambo mengi yamebadilika, ninajitahidi kuzoea mazingira haraka, binafsi najivunia kuwa hapa," alisema Makambo
Aidha, Makambo amesema anatarajia ushindani wa namba utakuwa mkubwa kikosini kutokana na usajili uliofanyika
"Ushindani utakuwa mkubwa sana msimu ujao, ukiangalia kila mchezaji ni mzuri, nitajitahidi sana kupambana kupata nafasi ndani ya kikosi cha kwanza, na kupitia pre-season nahisi nitaweza kujiweka sawa kufanya vizuri"
Makambo amesema hii itakuwa nafasi yake ya kwanza kuitumikia Yanga kwenye michuano ya ligi ya mabingwa na mkakati walionao wachezaji ni kuona wanafika mbali katika michuano hiyo
"Ndani ya Yanga hii ni mara ya kwanza nashiriki michuano ya Ligi ya Mabingwa, lakini nikiwa timu nyingine nimewahi kushiriki. Kutokana na uzoefu wangu, hakuna mashindano mepesi, lazima tutakutana na ugumu, lakini itategemea na maandalizi ya timu"
"Tutajiandaa vizuri. Yanga ni timu kubwa na kutokana na pre-season hii ilivyo nzuri na usajili uliofanywa, ninaimani tutafika mbali sana," aliongeza Makambo
