Kocha Mkuu wa Yanga Nasreddine Nabi amewahakikishia mashabiki wa timu hiyo kuwa msimu ujao ni zamu yao kufurahi
Nabi ameeleza kufurahishwa na usajili uliofanyika kwani umempatia timu yenye sura sahihi ya kupigania mataji
Baada ya kuwashuhudia wachezaji wake katika mazoezi ya kucheza mpira kwa siku mbili, Nabi amepata mwanga wa aina ya timu ambayo itaweza kushindania mataji msimu ujao
"Nimewaangalia wachezaji niliwaambia subirini kwanza nione kwa umakini ubora wa wachezaji ambao wamesajiliwa na sasa niseme msimu ujao tutakuwa na timu imara ambayo itakwenda kupigania heshima ya mataji ya Yanga"
"Niliongea na Ghalib (GSM) kabla ya msimu kumalizika aliniahidi atasajili timu imara na sasa nimeona kweli amekamilisha ahadi yake kwangu na sasa ni kazi yangu na wasaidizi wangu pamoja na wachezaji sasa kuthibitisha ubora wao, hili ni kundi la wachezaji waliokomaa, " Nabi alinukuliwa na Mwanaspoti
Nabi amewataka mashabiki kutokuwa na wasiwasi na timu yao, wasubiri afanye kazi yake, akihitaji takribani siku 90 kutengeneza kikosi cha maangamizi
Nabi amesema ratiba ya wachezaji wake kurudi timu za taifa na muda mfupi kabla ya kuanza mechi za Ligi ya Mabingwa vimeathiri mipango yake
"Tuna kundi la wachezaji wapya ambao ni wengi lakini ukiangalia ligi ilichelewa kumalizika na sasa muda wa maandalizi umekuwa mchache, muda si mrefu kundi kubwa la wachezaji litatawanyika tena na kurudi katika mataifa yao" alisema Nabi
"Wakirudi tutakuwa na siku chache tena kabla ya kuanza mechi za Ligi ya Mabingwa tukianza nyumbani kisha ugenini utaona jinsi mambo yanavyobana lakini niwaambie mashabiki watulie waniachie kazi wasiongeze presha kwa wachezaji, ndani ya siku 90 wataona kitu kikubwa hapa"
