Uongozi wa klabu ya Yanga umemtangaza aliyekuwa Mshauri wa Mabadiliko Senzo Mazingisa kuwa Mtendaji Mkuu wa klabu (CEO) katika kipindi cha mpito kuelekea mfumo mpya wa Uendeshaji
Akizungumza kwenye Mkutano na Wanahabari mapema leo, Makamu Mwenyekiti wa Yanga Fredrick Mwakalebela alisema Senzo atakuwa Mtendaji Mkuu wa mpito kusimamia yote yaliyopitishwa Katika Mkutano Mkuu wa Wananchama
Aidha Mwakalebela alisema Haji Mfikirwa ambaye alikuwa akikaimu nafasi ya Katibu Mkuu, amerejea katika nafasi yake ya Mkurugenzi wa Fedha na Utawala
Senzo ameushukuru uongozi wa Yanga kwa kumpa nafasi ya kusimamia maazimio yaliyofikiwa kwenye Mkutano Mkuu ili kufikia malengo
Ameahidi kushirikiana na viongozi wengine wa Yanga ili kuhakikisha wanakamilisha mchakato wa Mabadiliko
"Nashukuru sana kwa uongozi wa Yanga kunipa nafasi hii kusaidia kufikia malengo yetu. Sasa ni jukumu langu kuhakikisha Mabadiliko yanakamilika vyema," alisema Senzo
"Nitashirikiana na viongozi wenzangu akiwemo Haji ambaye licha ya kurudi kwenye nafasi yake ya zamani hakuna kitakachobadilika. Tuna kazi moja ya kuhakikisha klabu yetu inafanikiwa"
Nae Mfikirwa aliyekuwa akikaimu nafasi ya Katibu Mkuu, ameushukuru uongozi wa Yanga kwa kumpa nafasi hiyo
"Sasa tunakwenda kuyaishi Mabadiliko, Binafsi nashukuru kwa nafasi niliyokuwa nimepewa kukaimu. Kwa pamoja tutashirikiana kuweza kuifikisha Yanga tunapotaka ifike. Tumkaribishe Senzo kwenye nafasi yake mpya na tumpe ushirikiano wa kutosha"
