Imeelezwa klabu ya Rivers United imetua nchini kimyakimya kuelekea mchezo wa hatua ya awali dhidi ya Yanga ambao utapigwa Jumapili ijayo, Septemba 12 katika uwanja wa Benjamin Mkapa
Maafisa wa timu hiyo walishawasili mapema na wamekuwa wakiifanyia Yanga ushushu
Hata hivyo Yanga imewashtukia ambapo Afisa Habari Hassan Bumbuli amesema watu hao wapo Dar es Salaam na wamekuwa wakiwafuatilia, lakini nao wamekuwa makini
Bumbuli alisema kutokana na umakini walionao ndiyo maana wamekuwa hawachezi mechi za wazi ambazo mashabiki au kila mtu atakwenda kuziangalia, ili kuepuka mashushushu hao kusoma mbinu za kocha wao Nasreddine Nabi.
"Tumegundua kuwa wenzetu wameleta mashushushu wao. Lengo lao ni kutupeleleza, tupo vipi, waangalie mechi zetu ili kujua udhaifu wetu uko wapi. Lakini hili tumeligundua," alisema
Yanga ambayo ilicheza mechi kwenye kilele cha Wiki ya Wananchi Agosti 29, imecheza mechi zake mbili bila mashabiki dhidi ya Friends Ranger na kushinda mabao 3-1, lakini juzi ilicheza dhidi ya Pan African na kuichapa bao 1-0.
