Kocha Mkuu wa Yanga Nasreddine Nabi anaendelea kukisuka kikosi chake kule Avic Town Kigamboni kuelekea mchezo wa ligi ya mabingwa dhidi ya Rivers United ambao utapigwa Jumapili Septemba 12, 2021 katika uwanja wa Benjamin Mkapa
Baada ya mchezo wa wiki ya Mwananchi, Nabi ametumia wiki moja kukiweka sawa kikosi chake ambapo mpaka sasa wako tayari kuikabili Rivers United
Kocha huyo raia wa Tunisia amepania kufanya vizuri katika mchezo wa nyumbani akihitaji washambuliaji wake kufunga mabao mengi
Katika michezo miwili ya kirafiki ambayo Yanga wamecheza baada ya wiki ya Mwananchi, wamefunga mabao manne na kuruhusu bao moja
Akizungumza kwa niaba ya kocha Nabi, Meneja wa Yanga Hafidhi Salehe amesema maandalizi yao yamekamilika kwa kiasi kikubwa na anachokifanya kocha hivi sasa ni kuimarisha safu yao ya ushambuliaji ili kuzitumia nafasi wanazotengeneza
"Tumekuwa na maandalizi mazuri tangu kumalizika wiki ya Wananchi, tumefanya mazoezi ya kutosha na mechi mbili za kirafiki, zimemsaidia kocha kupata picha halisi ya kikosi chake kuelekea mchezo uliombele yetu"
"Karibu idara zote zipo sawa ulinzi na hata kiungo, kocha anaendelea kufanyia kazi eneo la umaliziaji lengo ni kufunga mabao mengi zaidi," alisema Hafidh
Nyota wa Kimataifa wanarejea
Habari njema kwa Yanga ni kuwa baadhi ya wachezaji waliokuwa na majukumu katika timu za Taifa, wanatarajiwa kurejea kuanzia leo
Kiungo Khalid Aucho raia wa Uganda na mlinda lango Djigui Diarra raia wa Mali huenda wakatua pamoja leo baada ya mchezo baina ya Mataifa yao uliopigwa nchini Uganda jana
Mlinzi kiraka Yannick Bangala yeye huenda akarejea kesho Jumatano wakati wachezaji wenye majukumu katika timu ya Taifa ya Tanzania, wanakamilisha leo kwa mchezo dhidi ya Madagascar na huenda wakaingia kambini baada ya mchezo huo
