Yanga imeanza msimu pasipo huduma ya walinzi wake wawili wa kushoto Yassin Mustafa na David Bryson ambao wameanza mazoezi karibuni baada ya kutoka kwenye majeruhi
Nyota hawa watakapokuwa 'fit' wataimarisha eneo la ulinzi upande wa kushoto ambalo sasa anahudumu Adeyum Saleh
Pamoja na wengi kukosoa kiwango alichoonyesha Adeyum Saleh katika mchezo uliopita dhidi ya Rivers United, bado Kocha Nasreddine Nabi atalazimika kumtumia nchini Nigeria kwa sababu bado Bryson na Yassin hawako tayari
Jambo la faraja ni kuwa nyota hao wanaweza kurejea mapema na pengine kuonekana uwanjani kwenye mchezo wa Ngao ya Jamii dhidi ya Simba ambao utapigwa Septemba 25
Tangu alipoumia Yassin katikati ya msimu uliopita, Yanga imekabiliwa na changamoto kwenye safu ya ulinzi upande wa kushoto
Usajili wa Bryson ulitarajiwa kumaliza changamoto, hata hivyo nae amelazimika kusubiri apone majeraha aliyopata mwishoni mwa msimu akiwa na KMC
