Msemaji wa klabu ya Yanga Haji Manara amesema pamoja na ugumu wa mchezo dhidi ya Rivers United utakaopigwa Nigeria Jumapili, wamejipanga kuhakikisha wanaibuka na ushindi
Akizungumza na Wanahabari mapema leo kuelekea mchezo huo, Manara amesema wanatambua mechi za ugenini zina mambo mengi ya nje ya uwanja lakini wamejipanga kukabiliana nayo
"Tunaenda kucheza mechi ambayo kwa vyovyote vile itakuwa ngumu, mechi za ugenini kwenye ligi ya mabingwa siku zote huwaga ni ngumu na hilo jambo tunalitarajia"
"Tunajua mechi za ugenini zina visa na mikasa mingi, kisaikolojia tumejipanga na tumejiandaa na hilo na ndiyo maana tulituma watu imara wakufanya maandalizi yote kabla ya timu kufika," alisema Manara
Manara amesema Yanga itaondoka nchini leo majira ya saa mbili usiku na itafika Nigeria saa tano usiku (saa saba) kwa saa za Tanzania
Katika hatua nyingine, Mtendaji wa Yanga Senzo Mazingisa ambaye yuko nchini Nigeria, amesema maandalizi kwa ajili ya mapokezi ya timu yako tayari
Pamoja na changamoto ya hujuma za hapa na pale, Senzo amesema wako tayari kukabiliana na mazingira ya aina yoyote
"Nimefika toka Jumatatu na kila kitu kimeenda sawa kuhusu hujma hua zipo tu haziwezi kukosa ila tunajitahidi kufanya kila tunaloweza ili tukabiliane nazo, lakini vizuri tunasubiri timu ifike kwanza halafu mengine yatafuata"
"Kila kitu kipo sawa kama ilivyokuwa inafanyika huko nyuma katika mashindano ya kimataifa na kwa upande wetu tupo sawa, tumepata mapokezi mazuri kutoka kwa balozi kilichobaki tunasubiri Mechi tu," alisema Senzo
