Afisa Habari wa Yanga Hassan Bumbuli amewataka mashabiki kujitokeza kwa wingi uwanja wa Benjamin Mkapa leo katika mchezo wa ligi kuu dhidi ya Geita Gold utakaopigwa kuanzia saa moja usiku
Bumbuli amewaambia Wananchi wajae, watafurahi pia watakuwa na kazi ya kuhesabu pasi za Yanga ili kuhakikisha hakutokeo mambo ya kukisia takwimu baada ya mchezo huo!
Kwa sasa Wananchi wana kila sababu ya kuwa na 'kiburi' kwani wana timu nzuri bhana
Muhimu zaidi ni kuongeza hamasa ili kuhakikisha alama zote tatu zinabaki jijini Dar es salaam
Baada ya kuanza kwa kusuasua katika misimu minne iliyopita, msimu huu Wananchi wameanza kwa ushindi kule Bukoba kwa kuichapa Kagera Sugar bao 1-0
Leo wanahitaji kuendeleza wimbi la ushindi, wakifunga mabao mengi wanaweza kujikuta wako kileleni mwa msimamo wa ligi, nafasi ambayo inashikiliwa na watani zao kwa muda
Msemaji wa Yanga Haji Manara jana aliwaambia wanahabari kuwa kila mchezo kwao una umuhimu mkubwa hivyo hawatawadharau Geita Gold kwa kigezo ni timu iliyopanda daraja
Wanahitaji kushinda mchezo huo katika mpango wa kutimiza malengo waliyojiwekea msimu huu, kutwaa ubingwa
