Wakati ligi ikisimama kupisha kalenda ya michuano ya Kimataifa, kikosi cha Yanga kitatumia mapumziko hayo ya Kimataifa kujiweka sawa ambapo Kocha Nasreddine Nabi ametaka atafutiwe michezo miwili ya Kimataifa
Baada ya mchezo dhidi ya Geita Gold, Nabi alisema wanatarajia kuelekea Arusha kuweka kambi maalum kabla ya mchezo dhidi ya KMC
Afisa Habari wa Yanga Hassan Bumbuli amesema wanafanyia kazi mapendekezo ya Mwalimu ambapo wanatafuta mechi hizo mbili moja ikitarajiwa kuchezwa jijini Dar es salaam na nyingine nje ya Jiji
"Ligi itasimama kwa wiki kadhaa, uongozi umepokea mapendekezo ya Mwalimu Nabi ambaye anataka michezo miwili ya Kimataifa. Tunatafuta mechi hizo mbili, mchezo tutacheza hapa Dar es salaam na mwingine tutaucheza nje ya Dar," alisema Bumbuli
Kikosi cha Yanga kinawakosa wachezaji wake nane ambao wanakabiliwa na majukumu ya timu za Taifa
Wachezaji hao ni Ramadhani Kabwili, Kibwana Shomari, Dickson Job, Feisal Salum, Saido Ntibazonkiza, Yacouba Songne, Djigui Diarra na Khalid Aucho
