Shirikisho la Soka Barani Afrika (CAF) limeipiga faini ya dola 5,000 klabu ya Yanga kwa kilichoelezwa kuvunja baadhi ya sheria na taratibu za mchezo wa ligi ya mabingwa barani Afrika walioucheza dhidi ya Rivers United ya Nigeria
Adhabu hiyo imetolewa na kamati ya Nidhamu ya CAF kutokana na malalamiko ya klabu ya Rivers United juu ya baadhi ya viongozi wao kughasiwa na walinzi wa uwanjani (Stewards) na baadhi ya mashabiki kuingia uwanjani wakati mchezo huo ambao ulipaswa kuchezwa bila mashabiki
Lakini ukifuatilia kwa undani utabaini katika makosa yaliyoainishwa na CAF, Yanga haihusiki na masuala yake moja kwa moja
Yanga haihusiki na ulinzi wa uwanja, haifanyi vipimo vya Covid 19, haina mamlaka ya kuruhusu mashabiki kuingia uwanjani na hata siku ya mchezo ilitoa taarifa ya kuwaomba radhi mashabiki wake baada ya CAF kuwazuia kuingia uwanjani
Wenye dhamana ya masuala yote ni TFF kwa kushirikiana na wamiliki wa uwanja wa Benjamin Mkapa
Na hata ukiangalia taarifa ya CAF mpaka mwisho utaona TFF wameonywa kwa kujitokeza kwa matukio mbalimbali yasiyohusiana na mchezo wa Yanga na Rivers ambayo yamelalamikiwa na klabu mbalimbali zilizokuja kucheza Tanzania
Malalamiko ya harufu vyumbani yalianza msimu wa 2018/19 wakati Simba ikishiriki michuano ya ligi ya mabingwa. Zipo timu ziligoma kuingia vyumbani kutokana na harufu kali
Yanga ni miongoni mwa timu zilizolalamikia harufu vyumbani na hata Dodoma Jiji msimu uliopita waligoma kuingia vyumba vya kubadilishia nguo wakati wakicheza na Simba kutokana na harufu kali
Msimu uliopita mambo haya yaliendelea, matukio ya wachezaji wa timu pinzani kuzuiwa kupitia vipimo vya covid yakashamiri
Kwa ufupi Yanga imeadhibiwa kwa makosa ambayo pengine yalifanyika huko nyuma na mengine yalifanyika pasipo wao kuwa na mamlaka ya usimamizi wa moja kwa moja
