Leo benchi la ufundi la Yanga litakuwa na mtihani mwingine wa kuamua wachezaji nane wa kigeni ambao wanapaswa kujumuishwa kwenye kikosi kitakachoikbaili Azam Fc katika mchezo wa ligi kuu ya NBC utakaopigwa kuanzia saa moja usiku
Ni mtihani hasa unapokuwa na wachezaji 10 ambao wote wana sifa ya kuanza kwenye kikosi cha kwanza lakini unalazimika kuwaacha wawili nje ili kukidhi matakwa ya kanuni
Kocha Msaidizi wa Yanga Cedric Kaze amesema ni jambo gumu lakini ndivyo kanuni inavyowaelekeza, wanalazimika kuifuata
Wachezaji ambao mpaka sasa wamejihakikishia nafasi ya kuingia katika wachezaji nane ni mlinda lango Djigui Diarra, Yannick Bangala, Khalid Aucho na Djuma Shabani
Wengine ni Fiston Mayele, Heritier Makambo na Jesus Moloko
Kati ya Yacouba Songne, Mukoko Tonombe na Saido Ntibazonkiza, wawili kati yao hawatajumuishwa kwenye kikosi leo
Pamoja na kulalamikiwa kuwa anapoteza nafasi nyingi za wazi, Yacouba amekuwa akianzishwa kwenye kikosi cha kwanza kutokana na aina ya uchezaji wake
Ni mchezaji msumbufu ambaye hupendelea kusukuma mashambulizi mbele kila anapopata mpira
Bado ana nafasi kubwa ya kuendelea kuaminiwa leo licha ya wengi kutamani kuona Saido akipewa nafasi yake
Saido alionyesha kiwango bora kwenye mchezo wa kirafiki ambao Yanga ilicheza karibuni dhidi ya JKT Tanzania, akitoa pasi ya bao lililofungwa na Yusufu Athumani
Bado itakuwa ngumu kwa Mukoko kuwatenganisha Bangala na Aucho ambao wametengeneza pacha bora sana kwenye eneo la kiungo
Kwa sasa Nabi hana sababu ya kutumia Bangala kwenye safu ya ulinzi kwa kuwa nahodha Bakari Nondo Mwamnyeto yupo
Aidha Bangala akicheza kiungo anaifanya Yanga kuwa imara zaidi katika eneo hilo pengine kuliko hata akicheza kwenye safu ya ulinzi
Hii Yanga ya sasa ukipewa upange kikosi unaweza kuchanganyikiwa...!
