Uwanja wa Mkwakwani umekuwa mgumu kwa Yanga kupata matokeo katika misimu ya hivi karibuni
Msimu uliopita Coastal Union ilikuwa timu ya kwanza kuifunga Yanga katika mchezo ambao ulipigwa hapo Mkwakwani
Msimu huu Yanga imedhamiria kumaliza unyonge, Wananchi wakipania kushinda mchezo utakaopigwa Jumapili, Januari 16
Baada ya kurejea kutoka Zanzibar, Kocha Mkuu wa Yanga Nasreddine Nabi aliagiza vijana wake waelekee moja kwa moja kambini kujiandaa na mchezo huo pamoja na ule unaofuatia dhidi ya Polisi Tanzania ambao utapigwa Januari 23 kwenye uwanja wa Ushirika, Moshi
Polisi Tanzania pia ilichangia kuvuruga hesabu za ubingwa kwa Yanga msimu uliopita wakiwalazimisha mabingwa hao wa kihistoria sare ya bao 1-1
Meneja wa Yanga Hafidh Saleh amesema wanaendelea vyema na maandalizi ya michezo hiyo ambapo ni wachezaji watano tu wanaokosekana
Wachezaji hao ni Djigui Diarra(Afcon), Kibwana Shomari na Abdallah Shaibu waliosafiri Tunisia kwa ajili ya matibabu
Pia wamo Yacouba Songne na Denis Nkane ambaye alipata majeraha kwenye michuano ya kombe la Mapinduzi visiwani Zanzibar
Nkane anatarajiwa kuwa nje ya uwanja kwa takribani wiki nne
