Mashabiki wa Yanga hawakufurahishwa kabisa na matokeo ya suluhu ya bila kufungana ambayo timu iliyapata dhidi ya Mbeya City hapo jana
Lakini kwa upande wa wapinzani wao Mbeya City, kwao ilikuwa shamrashamra ya aina yake
Mtu asiyefahamu anaweza kudhani Mbeya City wametwaa ubingwa kwa aina ya shamra shamra waliloshusha kwenye vyumba vya kubadilishia nguo
Hii ni ishara ya heshima na ukubwa wa Yanga. Kwa mara ya pili msimu huu tunaona timu inashangilia kupata alama moja dhidi ya Yanga!
Lakini pia kwa upande mwingine, ni ujumbe kwa wachezaji, benchi la ufundi na viongozi wa Yanga kuwa vita ya ubingwa msimu huu ni kubwa
Kuanzia sasa wafahamu kuwa Yanga inaposhuka uwanjani kucheza mechi yoyote ya ligi, hawachezi na timu moja
Kila timu watakayokutana nayo itaandaliwa vyema kuhakikisha inawatibulia mipango yao. Mbeya City waliwekwa kambini jijini Dar es salaam kwa wiki mbili kujiandaa na mchezo dhidi ya Yanga
Mechi za Yanga sasa zitakuwa ngumu sana kwa sababu watakuwa wakikabiliana na upinzani mara dufu
Wachezaji waongeze ukatili mbele ya lango la wapinzani, watumie kila nafasi wanayopata kufunga
Zimebaki mechi 16 kukamilisha msimu huu, hizo zote ni mechi za fainali kwa Yanga
Kwa mashabiki wakati wa kushangilia ubingwa bado, huu ni wakati wa kuhamasisha na kusapoti timu kuhakikisha alama tatu zinapatikana katika kila mchezo
Hesabu za ubingwa zifanyike mwezi May 2022 pale msimu utakapomalizika
