Msemaji wa klabu ya Yanga Haji Manara amesema Yanga haihitaji upendeleo wa aina yoyote kutoka kwa Bodi ya Ligi lakini wangependa kuona haki inatendeka katika usimamizi wa ligi ili kila timu ipate haki yake
Manara ameyasema hayo leo katika Mkutano na Wanahabari uliofanyika Makao Makuu ya klabu ya Yanga Mtaa wa Twiga na Jangwani jijini Dar es salaam
Manara amesema kumekuwa na mijadala kila mara kuhusu mwenendo wa waamuzi wanaochezesha mechi za ligi kuu msimu huu
Manara amesema kuwa Yanga na viongozi hawatoi malalamiko kwa Waamuzi ila wanafanya hivyo kuwakumbusha tu kwa kuwa Klabu yao ina mashabiki na wanaona haki haitendeki na wao kazi yao ni kusema kwa kuwa ndio Kazi ambayo wameichagua
"Nilifanya press, niliwasihi Wanayanga kote nchini tusiende kulalamika, nilisema waziwazi mimi binafsi nina imani na TFF na Bodi ya Ligi, huwa sipendi kuwa sehemu ya watu wanaokosoa mamlaka zinazosimamia mpira ndio maana niliwaambia twende tukacheze tukiamini ubora wa kikosi chetu bila kulalamika"
"Kuna matukio yasiyopungua 9 mpaka 10 yanayohusisha mechi za Simba ambazo watu wamelalamika kama watu wanavyolalamika kwenye mechi zingine hatuna shida na hilo lakini hiyo humanity iwe kwa timu zote"
"Refa wa mechi ya Yanga na Namungo aliadhibiwa hawa wa matukio mengine hawajachukuliwa hatua, wa mechi na Polisi alichukuliwa hatua Kwa sababu hakutoa red card kwa Djuma," alihoji Manara
"Kuna mechi Simba waliomba kutocheza kwa sababu wachezaji wao wanaumwa, siku iliyofuata sisi tunacheza Sumbawanga"
"Hakuna mechi ngumu tuliyocheza kama ile ya Prisons wachezaji wameingia wanaumwa lakini tuliambiwa hamjafuata utaratibu jinsi ya kuomba"
"Wamecheza kina Mwamnyeto na mapanadol Sita Sita, mchezaji akitoka Half Time anakula Panadol anakula Diclopar," aliongeza Manara
Manara amesisitiza kuwa Yanga haichezi ligi kwa lengo ya kutopoteza mchezo, malengo waliyojiwekea ni kutwaa ubingwa.
Manara amehoji kwa nini kuwa ikitokea timu pinzani inawafunga au kutoka sare kwenye mchezo dhidi ya Simba inaonekana kuwa timu hiyo imetumwa na imeahidiwa kupatiwa pesa kufanya hivyo?
Amefafanua kuwa, kinachotokea ni kwamba Simba huwa inataka kushinda kila mchezo lakini ukubwa wanaojipa kunawafanya kuwa kwenye hali hiyo ila timu zote ni sawa utofauti ni rangi za jezi na majina tu
"Sasa wenzetu ikitokea kwao wao, utasikia kumeahidiwa fedha hii, nyie nani? Kwa nini mshinde kila mechi?, mna nini?, Nyie ukubwa mnaojipa mmeupata wapi ?, Upi ?, Ukubwa na una-hustle dakika ya 90 na inapigwa mpaka dakika ya 97 pale, Ukubwa upi mnauzungumza?"
"Sisi Hatuchezi ligi hii kuwa unbeaten tunacheza kuwa champion, Sisi ni klabu ya mpira lazima tutafungwa, Ni wenzetu tu ambao wanaamini wakifungwa wamehujumiwa, Sisi tunajua hii ni klabu ya mpira lazima kuna siku utapigwa"
